विराटनगर । उद्योग संगठन मोरङले सञ्चालनमा ल्याएको स्टार्टअप एण्ड इनोभेसन कार्यक्रम अन्तर्गतका तेश्रो चरणका १८ सहभागीले आफनो आइडिया प्रस्तुत गरेका छन् । 

स्टार्टअप उद्यमीहरूले आफनो अवधारणा तथा व्यवसायका बारेमा लगानीकर्ता एन्जल इन्भेष्टर, व्यावसायिक सेवा प्रदायक, मेन्टर तथा समितिका सदस्यहरूसमक्ष आफ्नो प्रस्तुती गरेका थिए । संगठनले वितग तीन वर्षदेखि सञ्चालन गर्दै आएको यस कार्यक्रमको पहिलो चरणमा १७ र दोश्रो चरणमा १३ जना स्टार्टअपहरू ग्राजुएट भइसकेका छन् । 

संगठनले सामाजिक उत्तरदायित्वअन्तर्गत सञ्चालनमा ल्याएको कार्यक्रमको माध्यमबाट युवालाई स्वदेश मै उद्यमशिलता विकासतर्फ अभिप्रेरित गर्नुरहेको संगठनका अध्यक्ष राकेश सुरानाले बताए । 

उनले भने, “नवीन व्यावसायिक अवधारणा भएका युवाहरूलाई लक्षित गरेर कार्यक्रम सञ्चालन गरिएको हो । उद्यमशिलता रुपान्तरणका लागि मेन्टरहरूका माध्यमबाट आवश्यक प्राविधिक एवं व्यवसायिक विकास सेवाहरु उपलब्ध गराइरहेका छौँ । वित्तीय व्यवस्थापन समेत संगठनले गरिदिँदै आएको अध्यक्ष सुरानाले जानकारी दिए । 

अहिले युवा पलायन सबै क्षेत्रका लागि चिन्ताको विषय भएको बताउँदै उनले स्वदेश मै व्यवसायीक विकासको अवसर प्रदान गर्नु सबैको दायित्व भएको बताए । 

कार्यक्रममा विराटनगर महानगरपालिकाका मेयर नागेश कोइरालाले युवा उद्यमशिलता विकासका सन्दर्भमा महानगरपालिका सदैव हातेमालो गर्न तत्पर रहेको बताए । 

“तेश्रो चरणका १८ मध्ये उत्कृष्ट तीनजनालाई महानगरपालिकाको तर्फबाट सहयोग गर्नेछौँ,” उनले भने, “शून्यबाट सुरु गरेर शिखरसम्म पुग्नुपर्छ । युवाले आफूहरूमा निहीत सीपको व्यावसायिक विकासमा सक्रिय हुनुपर्छ ।” 

संगठनको स्टार्टअप एण्ड इनोभेसन कार्यक्रमका संयोजक सुरेन्द्र गोल्छाले विश्वका उदीयमान स्टार्टअपहरूमा युवा वर्गको वर्चश्व रहेको बताए । तेस्रो चरणका स्टार्टअपहरूलाई व्यावसायिक मोडलका रूपमा विकास गर्न बजार व्यवस्थापन, कर प्रशासन, मानव संशाधन व्यवस्थापन लगायतका विषयमा परामर्श प्रदान गरिने बताए ।