काठमाडौं । अफ्रिका कप अफ नेसन्समा दक्षिण अफ्रिकाले नामिबियाविरुद्ध ४–० को सहज जित निकालेको छ ।

आइतबार आइभोरी कोस्टस्थित कौलीबाली रंगशालामा दक्षिण अफ्रिकालाई जित दिलाउन थेम्बा ज्वानेले दुई र पेर्सी ताउ र थापेलो मासेकोले समान एक गोल गरे ।

खेलको १४औँ मिनेटमा ताउले प्राप्त पेनाल्टी सदुपयोग गर्दै दक्षिण अफ्रिकालाई अग्रता दिलाएका थिए । २५औँ मिनेटमा ज्वानेले गोल गर्दै दक्षिण अफ्रिकाको अग्रतालाई दोब्बर बनाए । ४०औँ मिनेटमा ज्वानेले दोस्रो गोल गरेपछि दक्षिण अफ्रिकाले पहिलो हाफमै ३–० को अग्रता बनाएको थियो । ७५औँ मिनेटमा मासेकोले गोल गरेपछि दक्षिण अफ्रिकाले ४–० को जित दर्ता गर्‍यो ।

जितसँगै दुई खेलबाट तीन अंक जोडेको दक्षिण अफ्रिका समूह ‘इ’को दोस्रो स्थानमा उक्लिएको छ । समान अंकका साथ नामिबिया तेस्रो स्थानमा छ ।

प्रतियोगिताअन्तर्गत आइतबार राति नै भएका अन्य खेलमा ट्युनिसिया र माली तथा जाम्बिया र तान्जानियाले समान १–१ को बराबरी खेल्दै अंक बाँडे ।