काठमाडौं । संकटा क्लबले एन्फा यू–१६ युथ लिग फुटबलमा विभागीय टोली सशस्त्र प्रहरी बलको एपीएफको पोस्टमा सात गोल प्रहार गरेको छ ।

मंगलबार ललितपुरस्थित एन्फा कम्प्लेक्समा संकटाले एपीएफमाथि ७–१ को फराकिलो जित निकालेको हो । संकटाको जितमा कृष्णबहादुर आलेले ह्याट्रिक गरे ।

यो जितसँगै संकटा ९ खेलबाट १९ अंक बटुल्दै शीर्ष स्थानमा उक्लिएको छ । संकटाभन्दा एक खेल कम खेलेको मच्छिन्द्र क्लब १७ अंकसहित दोस्रो स्थानमा छ । आठ खेलबाट ११ अंक जोडेको एपीएफ तालिकाको पाँचौँ स्थानमा छ ।

खेलको ११औँ मिनेटमा कृष्णबहादुरकै गोलबाट संकटाले अग्रता लिएको थियो । त्यसपछि २६औँ मिनेटमा स्वयमभक्त श्रेष्ठ, ३६औँ मिनेटमा दिलन लिम्बू र पहिलो हाफको इन्जुरी समयमा कृष्णबहादुरले दोस्रो गोल गरे ।

५३औँ मिनेटमा सविनकुमार लुंगेली मगरले गोल गर्दै संकटाको ५–० को अग्रतामा राखे । त्यसको तीन मिनेटपछि एपीएफले एक गोल फर्कायो । 

संकटाका लागि छैटौँ गोल अरुण श्रेष्ठले ८१औँ मिनेटमा गरे । कृष्णबहादुरले इन्जुरी समयमा तेस्रो गोल गर्दै ह्याट्रिक पूरा गरेपछि संकटाले ७–१ को सहज जित सुनिश्चित गरेको हो । जारी प्रतियोगितामा संकटाको यो छैटौँ जित हो ।