काठमाडौं । खेलको अन्तिम समयमा म्याट क्यासले गरेको गोल निर्णायक बनेपछि एस्टोन भिल्लाले एफए कपमा आठ वर्षपछि जित निकालेको छ ।

शनिबार रिभरसाइड रंगशालामा सम्पन्न खेलमा पाहुना टिमलाई जित दिलाउन क्यासले ८७औँ मिनेटमा निर्णायक गोल गरे । एफए कपमा सन् २०१६ पछि एस्टोन भिल्लाको यो पहिलो जित हो । यसअघि भिल्लाले पछिल्लो पटक वेकम्बेलाई आठ वर्षअघि तेस्रो चरणमा हराएको थियो ।

“हामीले खेलअघि एफए कपको बारेमा कुरा गरेका थियौं । यो ऐतिहासिक प्रतियोगिता हो । सायद विश्वकै उत्कृष्ट प्रतियोगिता हो यो । यस प्रतियोगितामा हाम्रा खेलाडीको कुरा गर्दा उनीहरु त्यति सफल छैनन् । टिमका इमिलियानो मार्टिनेज र क्यालम क्याम्बर्सले मात्र आर्सनलमा हुँदा यो प्रतियोगिताको उपाधि जितेका थिए,” जितपछि भिल्लाका प्रशिक्षक युनाइ इमेरीले भने, “एस्टोन भिल्लाले सातौँ उपाधि जितेको लामो समय भइसक्यो । र, हामी यहाँ क्लबको आगामी दिनमा राम्रो गर्ने प्रयासमा आएका हौँ ।”

सात पटक एफए कपको उपाधि जितेको एस्टोन भिल्ला पछिल्लो समय भने यस प्रतियोगितामा संघर्षरत छ । भिल्लाले पछिल्लो पटक सन् १९५७ मा एफए कपको उपाधि जितेको थियो ।