काठमाडौं । ब्राइटनका मुख्य प्रशिक्षक रोबर्टो डे जेब्रीले घाइते रहेका विंगर काओरु मितोमालाई एसियन कपका लागि जापानले टिममा बोलाउनु अचम्मित निर्णय भएको बताएका छन् । 

ब्राइटनले क्रिस्टल प्यालेसविरुद्ध १–१ को बराबरी खेल्दा मितोमाको खुट्टाको जोर्नीमा चोट लागेको थियो । जसका कारण मितोमा कम्तीमा ६ हप्ता मैदानबाट बाहिर रहने जनाएका थिए । तर, २६ वर्षीय मितोमालाई सोमबार जापानले राष्ट्रिय टिममा बोलाएपछि ब्राइटनका प्रशिक्षक डे जेब्री अचम्मित बनेका हुन् ।

“म यो कुराबाट निक्कै अचम्मित छु किनकी मलाई मेडिकल टिमले मितोमाको चोट ठिक हुन चारदेखि ६ हप्ता लाग्ने बताएका थिए,” मंगलबार वेस्ट हमसँग खेल्नुअघि डे जेब्रीले भने, “मेरा लागि उनले एसिया कप खेल्न सक्छन् भन्नेबारे सोच्नु नै निकै कठिन कुरा हो । तर, म मितोमा र टिमका सबै खेलाडीको समर्थक हुँ । यदि उनीहरूले राष्ट्रिय टिमबाट खेल्न सक्छन् भने यो मेरो लागि खुसी र गर्वको कुरा हो ।”

एसिया कप कतारमा जनवरी १२ देखि फेब्रुअरी १० सम्म सञ्चालन हुने तालिका छ । जापानका प्रशिक्षक हाजिमे मोरियासुले पनि मितोमाले जनवरी १४ मा भियतनामविरुद्ध खेल्नेबारे निश्चित नभएको बताएका छन् ।

“मितोमा पहिलो खेलका लागि तयार हुनेछन् वा छैनन् भन्नेबारे मलाई थाहा छैन । तर, उनी ठिक हुँदैछन् र चाँडै नै मैदान फर्किनेछन् भन्ने आस लिएको छु,” प्रशिक्षक मोरियासुले भने ।