काठमाडौं । नेपाली कांग्रेसका नेता शेखर कोइरालाले आसन्न महासमितिको बैठकबाट १५औँ महाधिवेशनको मिति तोकिनुपर्ने बताएका छन् ।

सोमबार राष्ट्रिय मेलमिलाप दिवसको अवसरमा प्रजातन्त्र सेनानी संघले काठमाडौंमा आयोजना गरेको वाग्मती प्रदेशस्तरीय भेलामा उनले पार्टीलाई सवल र सक्षम बनाउन समयमै १५औँ महाधिवेशन हुनुपर्ने धारणा राखे । 

कांग्रेस अहिलेको अवस्थामा अगाडि बढ्न नसक्ने बताउँदै कोइरालाले बलियो कांग्रेस बनाउन पार्टी महाधिवेशन तोकिएकै समयमा हुनुपर्ने बताए । 

फरक प्रसंगमा उनले जनताले मन्त्रीहरूको एक वर्षको रिपोर्ट कार्ड मागे पनि आफू भने प्रधानमन्त्री पुष्कमल दाहाल 'प्रचण्ड'कै रिपोर्टकार्ड मागेर बसेको बताए ।

“अहिले प्रधानमन्त्रीले मन्त्रीहरूको रिपोर्ट कार्ड मागिरहनु भएको छ । तर, म प्रधानमन्त्रीकै रिपोर्ट कार्ड मागिरहेको छु,” उनले भने, “प्रधानमन्त्रीले यो कार्यकालमा के के गर्नुभयो ? भुटानी शरणार्थी काण्ड कहाँ पुग्यो ? ललिता निवासको मुद्दा कहाँ पुग्यो ? सुनकाण्ड कहाँ पुग्यो ?”

नेता कोइरालाले सरकारले जनभावना अनुरूप काम गर्न नसकेको भन्दै सुशासन कायम गरेर समृद्धिको बाटोमा लैजान, भ्रष्टाचार निर्मूल गर्न, रोजगारीको अवसर सिर्जना गर्न र जनतामा आशा जगाउँन कांग्रेसको नेतृत्वमा सरकार बन्नुपर्ने बताए ।