काठमाडौं । प्रहरीको गोली लागेर मारिएका अछामको चौरपाटी गाउँपालिका–१ का २१ वर्षीय वीरेन्द्र शाहका बुवासहित केही पीडित आफन्त बालुवाटारतर्फ प्रस्थान गरेका छन् । शनिबार दिउँसो उनीहरू प्रधानमन्त्री पुष्पकमल दाहाल ‘प्रचण्ड’लाई भेट्न त्यसतर्फ गएका हुन् ।

वीरेन्द्रका बुवा टेकबहादुर शाहसहितका आफन्त यसअघि पाटन अस्पतालमा पुगेका थिए । त्यहाँ वीरेन्द्र र अर्का मृतक दैलेखको महाबु गाउँपालिका–६ का २३ वर्षीय सुजन राउतको शव राखिएको छ ।

दुवै शव आफन्तले बुझ्न बाँकी छ । करिब २०–२५ जनाको समूहमा रहेका आफन्त शव नबुझी बालुवाटारतर्फ अघि बढेका हुन् । शव बुझ्न कुनै माग भने नगरिएको प्रहरीले जनाएको छ ।

रोजगार अनुमति प्रणाली (ईपीएस)को आवेदन फाराम भर्न नपाएको भन्दै असन्तुष्ट युवाको समूहले शुक्रबार बालकुमारीस्थित ईपीएस कार्यालयअगाडि प्रदर्शन गरेको थियो । मन्त्रीको गाडीमा आगजनी समेत गरिएको थियो ।

प्रदर्शनकारी र प्रहरीबीच झडप भएको थियो । त्यसक्रममा शाह र राउतको मृत्यु भएको थियो ।

सो प्रदर्शनका क्रममा पक्राउ गरिएका ७३ जनालाई छाड्ने तयारी गरिएको छ । उनीहरूलाई आफन्तको जिम्मा लगाएर छाड्न लागिएको जिल्ला प्रहरी परिसर ललितपुरले जानकारी गराएको छ ।

उनीहरूलाई शनिबारै छाडिनेछ । पक्राउ गरिएका ७३ जनामाथि कुनै मुद्दा नचलाउने निर्णय गरिएको प्रहरी स्रोतले जानकारी गरायो ।