काठमाडौं । रोयल इन्फिल्डले रोयल मिटीओर ३५० सीसीका तीन नयाँ मोटरसाइकल सार्वजनिक गरेको छ ।

नेपालका लागि रोयल इन्फिल्डको आधिकारिक विक्रेता अल्फा अटोमोटिभले बुधबार नक्सालस्थित सोरुममा नयाँ मोटरसाइकल सार्वजनिक गरेको हो ।

त्रिवेणी ग्रुपका निर्देशक सुवासचन्द्र संघाइ र रोयल इन्फिल्डका नेपाल बजार प्रमुख अभिषेक सुक्लाले मिटीओर फायरबल, मिटीओर स्टेलर, र मिटीओर सुपरनोभा सार्वजनिक गरेका हुन् ।

यी मोटरसाइकलमा ३४९ सीसी सिंगल सिलिन्डर, फ्युल इन्जेक्टेड फोर स्ट्रोक, एयर–ओयल कुल्ड, इलेक्ट्रोनिक फ्युल इन्जेक्सन रहेको छ ।

इन्जिनले अधिकतम ६ हजार १०० आरपीएममा २०.२ ब्रेकहर्स पावर र चार हजार आरपीएममा २७ एनएमको टर्क जेनेरेट गर्ने कम्पनीले जनाएको छ ।

डुअल डिस्कब्रेक रहेका यी सबै मोटरसाइकलमा १५ लिटरको फ्युल ट्यांक रहेको छ । बाइकले प्रतिलिटर औसत ४० किलोमिटर माइलेज दिने कम्पनीले जनाएको छ ।

मोटरसाइकलमा एक हजार ४०० एमएमको व्हीलबेस, ७६५ एमएम सिटको उचाई, ट्विन डाउनटुव स्पाइन फ्रेम रहेको छ ।

तीन लाख ५० हजार मूल्य पर्ने मिटीओर फायरबल ३५० सीसी पहेलो, रातो, निलो र म्याट हरियो रंगमा उपलब्ध रहेको कम्पनीले जनाएको छ ।

कालो, निलो र रातो रंगमा उपलब्ध मिटीओर स्टेलर ३५० सीसीको मूल्य पाँच लाख ५५ हजार रहेको छ । यस्तै खैरो, निलो र रातो रंगमा उपलब्ध रोयल इन्फिल्ड मिटीओर सुपरनोभाको मूल्य पाँच लाख ६५ हजार रहेको छ ।