काठमाडौं । महान्यायाधिवक्ता दिनमणि पोखरेलले आफ्नो नेतृत्वमा भएका 'मुख्य उपलब्धि'हरू सार्वजनिक गरेका छन् । महान्यायाधिवक्ताको कार्यालयको ७३औँ स्थापना दिवसका अवसरमा पोखरेलले एक वर्षका उपलब्धिहरू सार्वजनिक गरेका हुन् ।

पाँच दिनपछि आफू नियुक्त भएको एक वर्ष पूरा हुने बताउँदै उनले अहिलेका उपलब्धि आफ्नै नेतृत्वमा हासिल भएको बताए ।

महान्यायाधिवक्ता पोखरेलले साइबरसम्बन्धी मुद्दाहरू काठमाडौं जिल्ला अदालतमा मात्र हेर्ने गरिएकोमा अहिले देशैभरका जिल्ला अदालतमा हेर्ने व्यवस्था गरिएको बताए । उनले आफ्नो प्रयासलाई सरकारले पनि साथ दिएका कारण सम्भव भएको बताए । 

पोखरेलले चेक अनादरका कसुर पनि उच्च अदालतमा मात्र हेर्ने व्यवस्था रहेकोमा सबै जिल्ला अदालतमा पठाउने काम यस अवधिमा भएको बताए ।  

उनले महान्यायाधिवक्ता कार्यालयको चासो अभियोजन र अनुसन्धानमा मात्र नभएर जेलभित्रका कैदीहरूको मानव अधिकारमा पनि भएको भन्दै प्यारोलसम्बन्धी व्यवस्था लागु गर्ने वातावरण निर्माण गरेको बताए ।

उनले भारतका महान्याधिवक्ताको नेपाल भ्रमणलाई पनि उपलब्धिकै रूपमा प्रस्तुत गरे ।

कसुरसँग सम्बन्धित सम्पत्ति जफथको विषयमा सम्भव भएसम्म अनुसन्धानकै क्रममा र सम्भव नभए अभियोजनपछि फिर्ता गर्नू भन्ने निर्देशन गरेको भन्दै सम्पत्ति नष्ट हुन नदिनेतर्फ सचेत रहेको बताए ।