काठमाडौं । नयाँ पुस्ताका हास्य कलाकारहरूले अमेरिकाका विभिन्न सहरमा कार्यक्रम गराउने भएका छन् । फ्लाई नेपाको आयोजनामा ‘अब हास्छ अमेरिका’ शीर्षकमा आयोजना हुन लागेको कार्यक्रमका लागि कलाकारको टोली दुई हप्तापछि अमेरिका प्रस्थान गर्नेछ । 

बिहीबार पत्रकार सम्मेलन गर्दै कार्यक्रम आयोजक फ्लाई नेपाका निर्देशक विनोद अधिकारीले अमेरिकाका दुई दर्जनभन्दा बढी सहरमा कार्यक्रम तय भइसकेको जानकारी दिए । अधिकारीका अनुसार कलाकारको अमेरिका हँसाउने यात्रा जनवरीको ५ तारिखदेखि भर्जिनियाबाट सुरु हुनेछ । 

अधिकारीले भने, “यो कार्यक्रम परदेशलाई घरदेशसँग जोड्ने कार्यक्रम हो । कोभिड महामारीपछि हामीलाई जुन शैलीको ताजगी चाहिएको छ, त्यो यो कार्यक्रमले पूरा गर्छ भन्ने हाम्रो विश्वास छ ।” 

यात्रामा सन्दीप क्षेत्री, सुमन कार्की, भरतमणि पौडेल, मेक्सम गौडेल, कैलाश कार्की, सजन श्रेष्ठ, सुमन कोइराला, सन्तोष थापा सहभागी हुनेछन् । 

एक महिनाभन्दा बढी चल्ने यात्राका लागि ह्यारिसबर्ग, मेरिल्यान्ड, पिट्सबर्ग, कोलम्बस, एक्रोन, न्युयोर्क, बोस्टन, न्युहेम्पसायर, कोलराडो, सिकागो, मिसिगन, ह्युस्टन, डल्लास, अस्टिन, लगभेगास, लसएन्जल्स, सानफ्रान्सिस्को आदि ठाउँका कार्यक्रम तय भइसकेको र बाँकी सहरका लागि पनि सम्झौताको क्रम जारी रहेको आयोजकले जनाएको छ ।