काठमाडौं । हिमालयन रिइन्स्योरेन्सको प्राथमिक सेयर (आईपीओ) भर्ने जति सबैले पाउने निश्चित भएको छ ।

सोमबार आवेदन दिने अन्तिम दिन साँझ ५ बजेर ८ मिनेट जाँदासम्मको तथ्यांकअनुसार सबै आवेदनकले यो कम्पनीको आईपीओ प्राप्त गर्ने निश्चित भएको हो ।

साँझसम्म १६ लाख ६० हजार २२ जनाले तीन करोड २२ लाख १५ हजार ७० कित्ता आईपीओ माग गर्दै आवेदन दिएका छन् ।

आवेदकको संख्या हेर्दा कम्पनीले सर्वसाधारणलाई जारी गरेको आईपीओ सबैले प्राप्त गर्नेछन् । कम्पनीले दुई करोड ४९ लाख कित्ता आईपीओ निष्कासन गरेको छ ।

आवेदकको संख्याअनुसार कम्पनीको आईपीओ प्रतिव्यक्ति १५ कित्ताका दरले प्राप्त गर्नेछन् । धेरैले १० कित्ता आईपीओ भर्ने भएकाले २० देखि ३० कित्ता भर्नेले समेत आईपीओ प्राप्त गर्न सक्ने सम्भावना रहेको सीडीएस एण्ड क्लियरिङ लिमिटेड (सीडीएससी)का प्रमुख कार्यकारी अधिकृत पूर्णप्रसाद आचार्यले बताए ।

साँझसम्म कम्पनीले निष्कासन गरेको आईपीओमा १.२९४ गुणा बढी आवेदन परेको छ । पहिलेको ट्रेन्ड हेर्दा कतिपयको रिजेक्ट हुन्छ । त्यसले गर्दा पनि माग गरेजति नै सबैले आईपीओ पाउन सक्ने सम्भावना बढी छ ।