काठमाडौं । विश्वका घनाढ्य अमेजन ईकमर्सका संस्थापक जेफ बेजोसले अमेरिकाको टेक्सास राज्यको एक पश्चिमी पहाडमा १० हजार वर्ष चल्ने घडीमा लगानी गरिरहेका छन् ।

१० हजार वर्षसम्मको समय जनाउने उक्त स्मारक घडी निर्माणका लागि बेजोसले चार करोड २० लाख अमेरिकी डलर लगानी गरिरहेका हुन् ।

यो घडी कम्प्युटर वैज्ञानिक एवं आविष्कारक ड्यानी हिलिसले डिजाइन गरिरहेका छन् । इन्जिनियरिङको एक आश्चर्य र कलाकृतिको उदाहरणका रूपमा समेत घडी निर्माण भइरहेको हो ।

यो एक मेकानिकल यन्त्र हो । यो पृथ्वीको थर्मल चक्रको शक्ति प्रयोग गरेर चल्ने बताइएको छ । यसमा सोलार सिंक्रोनाइजर, पेन्डुलम, चाइम जेनरेटर र गियर एवं डायलहरू समावेश छ । यसको उचाई करिब १५२ मिटर (५०० फिट) रहेको छ ।

घडी हरेक दिउँसो सूर्यसँग सिंक्रोनाइज हुने र यसले वर्ष, शताब्दी र हजार वर्ष (सहस्राब्दी)को रेकर्ड राख्ने छ । यसमा २५ लाख पटक फरक फरक घण्टी बज्ने चाइम जेनेरेटर समेत रहेको छ ।

घडीमा पनि पाँचवटा कोठा जस्तै वार्षिकोत्सव कक्ष रहेको र पहिलोले एक वर्ष, दोस्रोले १० वर्ष, तेस्रोले १०० वर्ष, चौथोले एक हजार वर्ष र पाँचौँले १० हजार वर्षको संकेत गर्छ ।

कक्षहरूमा समय सम्बन्धित कलाकृति र मानवताको भविष्यबारे सन्देश राखिनेछन् । पहिलो कक्षमा सौर्यमण्डलको मोडेल राखिने र अन्य कक्षा भविष्यका पुस्ताले भर्नेछन् ।

मानवताको उज्ज्वल भविष्य र दीर्घकालीन सोचका साथ ड्यानी हिलिसको दर्शनबाट प्रेरित भएर बेजोसले यसमा लगानी गरिरहेको बताइएको छ । हाल निर्माणकै क्रममा रहेको यो घडी कहिले बनीसक्छ भन्ने मिति सार्वजनिक भएको छैन ।