काठमाडौं । रुसी सेनामा भर्ती भएका कैलाली टीकापुरका एक युवाको मृत्यु भएको छ । तीन महिनअघिरुसी सेनामा भर्ती भएका टीकापुर नगरपालिका–१ दुर्गानगरका ३६ वर्षीय भरत शाहको युद्धमा मृत्यु भएको हो ।

करिब आठ वर्ष नेपाल प्रहरीको जवान भएर काम गरेर शाह तीन वर्षअघि प्रहरीबाट राजीनामा दिएर दुबई पुगेका थिए ।

शाहको मृत्युबारे हालसम्म परराष्ट्र मन्त्रालय र रुसी सरकारले औपचारिकरूपमा परिवारलाई जानकारी दिएका छैनन् । उनीसँगै सेनामा भर्ती भएका कञ्चनपुरको एक युवाले शाहको मृत्यु भएको सन्देश पठाएका हुन् ।

हालसम्म परराष्ट्र मन्त्रालयले रुसी सेनामा भर्ती भएका ६ नेपालीको मृत्यु भएको सार्वजनिक गरेको छ । योसँगै सातजना नेपालीले रुस–युक्रेनको लडाइँमा ज्यान गुमाएका छन् ।