काठमाडौं । युनाइटेड अरब इमिरेट्स (यूएई) घरेलु मैदानमा जारी एसीसी यू–१९ एसिया कपको फाइनलमा प्रवेश गरेको छ । शुक्रबार भएको सेमिफाइनलमा टेस्ट राष्ट्र पाकिस्तानलाई ११ रनले हराउँदै एसोसिएट टोली यूएईले प्रतियोगिताको फाइनलमा स्थान बनाएको हो । 

दुबईस्थित आईसीसी एकेडेमीमा भएको सेमिफाइनलमा यूएईले प्रस्तुत गरेको १९४ रनको पछ्याएको पाकिस्तानले ४९.३ ओभरमा सबै विकेट गुमाएर १८२ रनमात्र बनायो । 

अब उपाधिका लागि यूएईले बंगलादेशसँग खेल्ने छ । बंगलादेशले पनि आजै भएको सेमिफाइनलमा भारतलाई चार विकेटले हराउँदै फाइनलमा स्थान पक्का गरेको हो । 

प्रतियोगितामा नेपाल पनि छनोट भएको थियो । तर, नेपालले भने समूह चरण पार गर्न सकेन । भारत, पाकिस्तान र अफगानिस्तानसँगै समूह ‘ए’ मा नेपालले तीन वटै खेलमा हार बेहोरेको थियो ।

प्रतियोगिताको फाइनल खेल आइतबार हुने छ ।