![न्युक्यासल र मिलान बाहिरिए](https://12khari.top/uploads/posts/ewqfg-1702526858.jpg)
काठमाडौं । इंग्लिस क्लब न्युक्यासल युनाइटेड यूईएफए च्याम्पियन्स लिगको समूह चरणबाटै बाहिरिएको छ । बुधबार राति भएको खेलमा न्युक्यासल घरेलु मैदान सेन्ट जेम्सपार्कमा एसी मिलानसँग २–१ ले पराजित भएपछि समूह चरणबाटै बाहिरिएको हो ।
खेलको ३३औँ मिनेटमा जोइलिघंटनले घरेलु टोलीलाई अग्रता दिलाएका थिए । ५९औँ मिनेटमा क्रिस्टियन पुलिसिकले बराबरी गरे । सामुयल चुकवुजले ८४औँ मिनेटमा निर्णायक गोल गरेका हुन् ।
जितका बाबजुद एसी मिलान समूह ‘एफ’मा गोलअन्तरमा पछि पर्यो । समूह चरणबाट अघि बढ्न सकेन । समूहमा ६ खेलबाट ११ अंकसहित डर्टमन्ड शीर्ष स्थानमा रह्यो ।
दोस्रो स्थानको पेरिस सेन्ट जर्मेन (पीएसजी) र मिलानको समान आठ अंक थियो । गोलअन्तरमा मिलान पछाडि परेपछि पीएसजी उपविजेताका रूपमा अन्तिम–१६ मा प्रवेश गरेको हो । पुछारको न्युक्यासलको ६ खेलबाट पाँच अंक मात्र रह्यो ।
बुधबार राति नै भएको खेलमा बोरुसिया डर्टमन्ड र पीएसजीले १–१ गोलको बराबरी खेलेका हुन् ।