काठमाडौं । अवैध हिरासहित काठमाडौंको दक्षिणकाली नगरपालिका–५, फर्पिङबाट एकजना पक्राउ परेका छन् । करिब तीन लाख २७ हजार ३३९ रुपैयाँबराबरको हिरासहित भारतको पश्चिम बंगालका ४४ वर्षीय सञ्जय मैतीलाई प्रहरीले नियन्त्रणमा लिएको हो ।

काठमाडौंको सुन्धारामा बस्दै आएका उनलाई गए राति पक्राउ गरिएको प्रहरी प्रधान कार्यालयले जानकारी गराएको छ ।

उनी वीरगन्जबाट काठमाडौंतर्फ आउँदै गरेको ना१ज ५४७७ नम्बरको सुमोमा सवार थिए । जाँच गर्ने क्रममा प्रहरीले उनलाई पक्राउ गरेको हो ।

भन्सार छली ल्याएको उक्त धातु सुनचाँदी व्यवसायी संघबाट परीक्षण गर्दा हिरा भएको पुष्टि गरिएको प्रहरीले जनाएको छ ।