काठमाडौं । नेपाल स्टक एक्सचेन्ज (नेप्से)मा सूचीकृत कम्पनीले संस्थापक तथा आयोजना प्रभावित क्षेत्रका बासिन्दाको सेयरको लकइन अवधि सकिनुभन्दा एक महिना अगाडि सबैलाई जानकारी दिनुपर्ने व्यवस्था भएको छ ।

नेपाल धितोपत्र बोर्डले नेपाल स्टक एक्सचेन्ज, सीडीएस एण्ड क्लियरिङ (सीडीएससी) र सम्पूर्ण सूचीकृत कम्पनीहरूलाई निर्देशन दिएको हो ।

सर्वसाधारण  लगानीकर्ताहरूलाई समेत सो सम्बन्धमा जानकारी प्राप्त हुने व्यवस्था गर्न तथा धितोपत्र बजारमा हुने कारोबारलाई थप व्यवस्थित तथा पारदर्शी बनाउन आवश्यक देखिएकाले यो व्यवस्था गरेको बोर्डले जानकारी दिएको छ ।

यसरी सूचना प्रकाशन गर्दा लकइनमा रहेको कुल सेयर संख्या, लकइन अवधि समाप्त हुने  मिति समेत स्पष्टरूपमा खुलाइ सार्वजनिक जानकारीका लागि सार्वजनिक सूचना प्रकाशन गर्नुपर्ने र सोको जानकारी धितोपत्र बोर्ड, नेप्से र सीडीएससीलाई पनि जानकारी दिनुपर्ने व्यवस्था गरिएको हो ।

सूचना प्राप्त भएपश्चात नेप्से र सीडीएससीले लकइन अवधि खुलेको एक हप्तासम्म वेबसाइटमा राख्नुपर्ने बताइएको छ ।