काठमाडौं । नेपाल राष्ट्र बैंकका गभर्नर महाप्रसाद अधिकारीले आन्तरिक रेमिट्यान्स सानो आकारमा मात्रै खुलाउने तयारी भएको बताएका छन् । 

मौद्रिक नीतिको पहिलो त्रैमासिक समीक्षा सार्वजनिक गरेपछिको पत्रकार सम्मेलनमा गभर्नर अधिकारीले यस्तो बताएका हुन् ।

अध्ययन गरेर नै रेमिट्यान्स सेवा बन्द गरेको उनले बताए । "सुरूमा एक लाख २५ हजार हुँदै बन्द गरेको हो । तर, विभिन्न एजेन्सीले समस्या भयो । तल्लो तहमा पैसा पठाउन समस्या भयो भनेपछि हामीले अध्ययन गरिरहेका छौँ," उनले भने  "अध्ययन अन्तिम चरणमा पुगेको छ । त्यसबाट प्राप्त सुझावका आधारमा १०-१५ हजारको सीमा राखेर खुलाउने तयारीमा छौँ ।"

हुन्डी कारोबार बढेको भन्दै आन्तरिक रेमिट्यान्स सेवा बन्द गरिएको थियो । गभर्नर अधिकारीले मुद्रास्फीति घट्दै गएकाले मौद्रिक नीतिको समीक्षामार्फत नीतिगत दर हेरफेर गरेको बताए ।