काठमाडौं ।  प्रहरीले नेपालीलाई अवैध बाटोबाट रुसी सेनामा भर्ती हुन रुस पठाउने ठूलो गिरोहलाई नियन्त्रणमा लिएको छ ।  उनीहरूलाई काठमाडौंको विभिन्न ठाउँबाट पक्राउ गरिएको जानकारी प्रहरी उच्च स्रोतले बाह्रखरीलाई दियो । स्रोतले भन्यो, “हालसम्म १२ जना पक्राउ परेका छन् । अझै अनुसन्धान र खोजी जारी छ ।”

पक्राउ परेकामध्ये हरि बिक र सुजाता दाहाल मुख्य एजेन्ट भएको खुलेको छ । उनीहरूलाई प्रहरीले पक्राउ गरिसकेको छ ।

प्रहरीको प्रारम्भिक अनुसन्धानका क्रममा उनीहरूले नेपालीलाई भारतको दिल्ली हुँदै रुस पठाउने गरेको पाइएको छ । नेपालस्थित भारतीय दुतावासबाट ‘नो अब्जेक्सन लेटर’ बनाएर दिल्लीबाट रुस पठाउने गरेको अनुसन्धानमा खटिएका प्रहरी अधिकारीको दाबी छ ।

नेपाल प्रहरीले भारतीय दुतावाससँग समेत यस विषयमा छलफल गरेको छ । पछिल्लो समय त्रिभुवन विमानस्थलबाट ‘भिजिट भिसा’मा जाने नेपालीमाथि कडाई गर्न थालेपछि भारत हुँदै मुलुक पठाउने गरेको खुलेको हो । 

मानव तस्कर समूहले रुस पठाउन प्रतिव्यक्ति १२ लाख रुपैयाँ असुल गर्ने गरेको प्रहरीको अनुसन्धानबाट खुलेको छ । सोमबार मात्रै प्रधानमन्त्री पुष्पकमल दाहाल प्रचण्डले रूसी सेनामा भर्ती हुन ५३ नेपाली दिल्ली हुँदै रुस गएको सूचना आफूसँग रहेको बताएका थिए ।

प्रधानमन्त्री दाहालले सञ्चारमाध्यमका सम्पादकहरूसँग कुरा गर्दै भनेका थिए, “हिजोमात्रै दिल्लीबाट २६ र २७ जना गरी दुई समूहमा रुसी सेनामा भर्ती हुन गएको सूचना प्राप्त भएको छ ।”

परराष्ट्र मन्त्रालयले सोमबार रुसी सेनामा भर्ती भएका ६ जना नेपालीको ज्यान गएको पुष्टि गरेको थियो ।

परराष्ट्र मन्त्रालयका अनुसार, गोरखाका सन्दीप थपलिया, कपिलबस्तुको वाणगंगा–१ का रूपक कार्की, पोखराका देवान राई, स्याङ्जा पुतलीबजार–५ का पितम कार्की, दोलखाको मेलङ–६ का राजकुमार रोका र इलामका गंगाराज मोक्तानको मृत्यु भएको छ ।

प्रहरीले मृत्यु भएका दुई जनालाई समेत पक्राउ परेकै समूहले पठाएको दाबी गरेको छ । यसरी अवैध बाटोबाट रुप पठाउने समूहमा केही नेपाली सेनाका अवकाशप्राप्त व्यक्तिहरू संलग्न समेत रहेको प्रहरीको दाबी छ ।

प्रहरीले प्रधानमन्त्री कार्यालयलाई मंगलबार रुस पठाउने समूह पक्राउबारे रिपोर्ट गरेका छन् । प्रहरीमा कुनै पनि पीडितले उजुरी नदिएका कारण उनीहरूमाथि अभद्र व्यवहारमा दर्ता गरी अनुसन्धान गरिरहेको छ ।

प्रहरी प्रधान कार्यालयले उनीहरूमाथि अनुसन्धान गर्न प्रहरीको मानव बेचबिखन ब्यूरो, उपत्यका अपराध अनुसन्धान कार्यालय र काठमाडौं प्रहरी गरी तीनवटै निकायलाई निर्देशन दिएको छ ।  रुस र युक्रेनको युद्धपछि नेपालीहरू अवैध रुपमा रुस पुगेर रुसी सेनामा भर्ती हुन थालेका छन् ।