![महाधिवेशन मितिबारे एकीकृत समाजवादी अनिर्णीत](https://12khari.top/uploads/posts/Samajbadi-Baithak2-1701672020.jpg)
काठमाडौं । सत्तारुढ नेकपा (एकीकृत समाजवादी) राष्ट्रिय महाधिवेशनको मितिबारे अनिर्णीत भएको छ ।
आज (सोमबार) पार्टी कार्यालय आलोनगरमा बसेको सचिवालय बैठकमा मिति सार्नेबारे छलफल भए पनि निर्णय नभएको उपहासचिव जगन्नाथ खतिवडाले जानकारी दिए ।
एकीकृत समाजवादीले यसअघि माघ १४ देखि १८ गतेसम्म महाधिवेशन गर्ने निर्णय भएको थियो । तर, पार्टीको जागरण अभियानको सन्देश, जाजरकोट भूकम्प र राष्ट्रियसभाको निर्वाचनका कारण मिति सार्नुपर्ने खतिवडाको भनाइ छ ।
त्यसबारे निर्णय लिन भोलि पनि बैठक बस्ने उनले बताए । उनले पार्टीका अध्यक्ष माधवकुमार नेपाल र सम्मानित नेता झलनाथ खनालको वैचारिक असहमतिका कारण महाधिवेशन सर्ने कुरा नभएको जिकिर पनि गरे ।
“महाधिवेशन मत बजाउने थलो नै हो । विचारको विमर्श गर्ने ठाउँ हो । महाधिवेशनमा विचार छलफल हुन्छन् । त्यही कारणले महाधिवेशन सदैन,” उनले भने ।
आजको बैठकले आगामी माघ ११ गते हुने राष्ट्रियसभा चुनावका लागि दल दर्ता गर्ने निर्णय गरेको जानकारी दिए ।
त्यस्तै, सम्मानित नेता झलनाथ खनालले पनि राष्ट्रियसभाको निर्वाचनका कारण महाधिवेशन मिति केही दिन सार्न सकिने बताए । भोलिको बैठकले मितिबारे निर्णय गर्ने जानकारी दिए ।