काठमाडौं । नेपाल सुपर लिग (एनएसएल)को दोस्रो संस्करणमा स्पोर्टिङ इलाम डे मेची एफसी र एफसी बुटवल लुम्बिनीबीचको पहिलो हाफ गोलरहित बराबरीमा सकिएको छ ।

त्रिपुरेश्वरस्थित दशरथ रंगशालामा जारी खेलमा दुवै टिमले गोलका केही अवसर सिर्जना गरे पनि सदुपयोग गर्न नसक्दा अग्रता बनाउन सकेनन् ।

खेलको तेस्रो मिनेटमै इलामलाई ‘भाग्य’ले साथ दिएन । फरवार्ड फोडे कामराको सुन्दरको क्रसमा पेनाल्टी बक्समा रहेका भरत खवासले गरेको वान टच प्रहार पहिलो बारमा लाग्दै फर्किएको थियो ।

छैटौँ मिनेटमा बुटवल लुम्बिनीका कप्तान एरिक विष्टको प्रहार इलामका गोलकिपर विकेश कुथुका निम्ति गतिलो खतरा बन्न सकेन । मिडफिल्डर अब्डौल्जे बाले आशीष लामालाई ३५ यार्ड पर फाउल गरेपछि बुटवलले फ्रीकिक पाएको थियो । तर, मार्की खेलाडी विष्टको प्रहार इलामका गोलकिपर विकेशले सहजै बचाए ।

२६औँ मिनेटमा अमाथ ड्वले अवसर सदुपयोग गर्न नसक्दा इलामले अग्रताको मौका खेर फाल्यो । फोडे कामाराले राइट साइडमा उपलब्ध गराएको बल एक रक्षकलाई कटाउँदै ड्वले गरेको प्रहार माथिबाट बाहिरियो ।

इलाम आज दोस्रो जितको खोजीमा छ । उद्घाटन खेलमा इलाम साविक विजेता काठमाडौं रेजर्ससँग १–० ले निराश बनेको थियो । इलामले दोस्रो खेलमा झापालाई १–० ले हराएको थियो ।

यसअघिका दुवै खेलमा पराजित बुटवल अंकविहीन छ । पहिलो खेलमा बुटवल ललितपुरसँग २–० ले हारेको थियो । बुटवलले दोस्रो खेलमा धनगढीविरुद्ध पनि हार व्यहोरेको थियो ।