काठमाडौं । नेपाल सुपर लिग (एनएसएल)को दोस्रो संस्करणमा वीरगंज युनाइटेडविरुद्ध चितवन एफसीले पहिलो हाफमा १–० को अग्रता बनाएको छ ।

त्रिपुरेश्वरस्थित दशरथ रंगशालामा जारी खेलको २८औँ मिनेटमा विमल घर्ती मगरले गोल गर्दै चितवनलाई अग्रतामा राखेका थिए । मध्यभागबाट रोशन रानामगरले निकालेको उत्कृष्ट ‘थ्रू’ बललाई नियन्त्रणमा लिँदै विमलले ‘वान भर्सेस वान’ मा वीरगंजका गोलकिपर दीप कार्कीलाई बिट गरी खाली पोस्टमा गोल गरे ।

आजको खेलमा दुवै टिम पहिलो जितको खोजीमा छन् । वीरगंज यसअघि पहिलो खेलमा धनगढी एफसीसँग २–१ ले पराजित भएको थियो । चितवनको यो प्रतियोगितामा तेस्रो खेल हो । चितवनले पहिलो खेलमा धनगढी एफसीसँग १–० को हार बेहोरेको थियो । दोस्रो खेलमा काठमाडौं रेजर्ससँग १–१ को बराबरी खेल्दै अंक बाँडेको थियो ।

दुई खेलबाट एक अंक जोडेको चितवन तालिकाको छैटौँ स्थानमा छ । अंकविहीन वीरगंज भने तालिकाको पुछारमा छ ।

मंसिर ८ गतेदेखि सुरु भएको प्रतियोगितामा नौ टिमको सहभागिता छ । प्रतियोगिताको यस सिजन काठमाडौं रेजर्स, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगंज एफसी, ललितपुर सिटी एफसी, बुटवल लुम्बिनी र पोखरा थन्डर्स सहभागी छन् ।

एनएसएलको पहिलो संस्करणको उपाधि काठमाडौं रेजर्सले जितेको थियो । 

आयोजक नेपाल स्पोर्ट्स एन्ड इभेन्ट म्यानजमेन्टले प्रतियोगिताका लागि साधारणतर्फ २०० र विशिष्टतर्फ ५०० रुपैयाँ टिकट मूल्य तोकेको छ ।