काठमाडौं । नक्कली भुटानी शरणार्थी प्रकरणमा काठमाडौं जिल्ला अदालतले दिएको थुनछेक आदेशविरुद्धको पुनरावलोकन निवेदनमाथिको सुनुवाइमा आज सरकारी वकिलले बहस गरेका छन् ।
उच्च अदालत पाटनमा गतहप्तादेखि सुरु भएको सुनुवाइमा बुधबार तीनजना सरकारी वकिलको बहस सकेर हेर्दाहेर्दैमा राखिएको छ । भोलि बिहीबार सरकारी वकिलको बहस सकिएपछि प्रतिवादीहरु (निवेदक)का कानुन व्यवसायीले जवाफी बहस गर्ने पाटन उच्च अदालतका उपरजिष्ट्रार तथा प्रवक्ता तिर्थराज घिमिरेले जानकारी दिए ।
अहिलेकै प्रक्रियामा बहस अघि बढेमा शुक्रबार फैसला आउन सक्ने आकलन गरिएको उनले जानकारी दिए ।
नेपाली नागरिकलाई नक्कली भुटानी शरणार्थी बनाएर अमेरिका पठाउन नेपाल सरकारका मन्त्री र उच्च सरकारी कर्मचारीसमेत संलग्न भएको भन्दै मुद्दा चलेपछि गत असार १ गते काठमाडौं जिल्ला अदालतले दुईजनाबाहेक सबै अभियुक्तलाई पुर्पक्षका लागि थुनामा पठाउन आदेश गरेको थियो ।
थुनामा परेका बालकृष्ण खाँण, टोपबहादुर रायमाझीसहितका व्यक्तिले थुनछेक आदेशविरुद्ध उच्च अदालतमा पुनरावेदन गरेका हुन् ।
