काठमाडौं । युवा एमेच्योर गल्फर सद्भाव आचार्यले सूर्य नेपाल गल्फ टुर २०२३–२४ अन्तर्गत सिजनको पहिलो प्रतियोगिता सूर्य नेपाल सेन्ट्रल ओपनको उपाधि जित्न सफल भएका छन् ।

प्रोफेसनल खेलाडी दिनेश प्रजापतिलाई सात स्ट्रोकले हराउँदै सद्भावले करियरको दोस्रो उपाधि जितेका हुन् । उनले गत सिजन सूर्य नेपाल च्यालेन्ज जितेका थिए ।

अन्तिम दिन बिहीबार ३–अन्डर ६९ स्कोर गर्दा सद्भावले समग्रमा १७–अन्डर २७१ को उत्कृष्ट नतिजामा सहभागी ३३ प्रोफेसनल गल्फरलाई माथ दिँदै प्रोफेसनल र एमेच्योर दुवैतर्फको उपाधि जितेका हुन् ।

इभन–पार ७२ खेल्दै समग्रमा १०–अन्डर २७८ सहित दिनेश प्रजापति दोस्रो भए । प्रोफेसनलतर्फ पहिलो हुँदा उनले एक लाख ४५ हजार रुपैयाँ नगद पुरस्कार प्राप्त गरे ।

समग्रमा ७–अन्डर २८१ को नतिजामा भुवन नगरकोटी तेस्रो भए । उनले बिहीबार इभन–पार ७२ मा खेल सकाए । प्रोफेसनलतर्फ दोस्रो हुँदा उनले ९४ हजार रुपैयाँ पुरस्कार हात पारे ।

बिहीबार २–ओभर ७४ स्कोर गरेका सञ्जय लामाले समग्रमा इभन–पार २८८ प्रदर्शनमा चौथो भए । प्रोफेसनलतर्फ तेस्रो भएका उनलाई ७० हजार रुपैयाँ प्रदान गरियो ।

समग्रमा २–ओभर २९० को स्कोरमा निरज तामाङ पाँचौँ भए । उनले अन्तिम १८ होलको खेल इभन–पार ७२ मा सकाए र ५८ हजार रुपैयाँ पुरस्कार पाए ।

पहिलो दिनका लिडर टासी छिरिङ एमेच्योरतर्फ दोस्रो भए । बिहीबार ३–ओभर ७५ स्कोर गरेका उनले समग्रमा ३–ओभर २९१ को नतिजामा प्रतियोगिता सकाए । समग्रमा उनी छैटौँ भए ।

समग्रमा ४–ओभर २९२ सहित रबि खड्का सातौँ भए । उनले बिहीबार इभन–पार ७२ मा खेल सकाए । उनले ५० हजार प्राप्त गरे ।

बिहीबार ७–ओभर ७९ सहित समग्रमा ५–ओभर २९३ मा खेल सकाउँदै जयराम श्रेष्ठ आठौँ भए । उनले ४२ हजार ५०० पुरस्कार राशि हात पारे ।

समग्रमा ६–ओभर २९४ सहित धनबहादुर थापा र तोरणविक्रम शाही संयुक्त रूपमा नवौँ भए । धनले बिहीबार ६–ओभर ७८ र तोरणले ३–अन्डर ६९ स्कोर गरे । दुवैले ३७ हजार २५० रुपैयाँ प्राप्त गरे ।

विजयी खेलाडीहरूलाई सूर्य नेपाल प्रालिका उपाध्यक्ष (मार्केटिङ) दीप्रा लाहीरी र नेपाल गल्फ संघका अध्यक्ष टासी घलेले पुरस्कार वितरण गरे । ७२ होलको चारदिने प्रतियोगितामा ३३ प्रोफेसनल र पाँच एमेच्योर गरी कुल ३८ खेलाडीको सहभागिता थियो ।