काठमाडौं । केपी ओली कप राष्ट्रिय ट्वान्टी–२० क्रिकेट प्रतियोगिता–२०८० मा सन्दीप लामिछानको कप्तानीमा रहेको वाग्मती प्रदेशले विजयी सुरुआत गरेको छ ।

बिहीबार कास्कीस्थित पोखरा क्रिकेट मैदानमा सम्पन्न समूह ‘ए’ को खेलमा वाग्मतीले आयोजक मदन भण्डारी स्पोर्ट्स क्लब रातोविरुद्ध १०९ रनको सहज जित निकालेको हो ।

पोखरा क्रिकेट मैदानमा वाग्मतीले प्रस्तुत गरेको १८५ रनको लक्ष्य पछ्याउने क्रममा मदन भण्डारी स्पोर्ट्स क्लबले १४.२ ओभरमा सबै विकेट गुमाएर ७५ रनमात्र जोड्न सक्यो ।

मदन भण्डारीका ओपनर तथा कप्तान अमर मिश्रा र विजय प्रजापतिले समान १३ रन जोडे । यस्तै, सन्तोष यादवले १२ र निर्मल थापाले १० रन जोड्नुबाहेक एकेडेमीका अन्यले दोहोरो अंकमा रन जोड्न सकेनन् ।

मदन भण्डारी एकेडेमीलाई सस्तैमा समेट्न वाग्मतीका कप्तान सन्दीपले चार विकेट लिए । सुवास कार्कीले तीन, प्रतिश जिसीले दुई र रिजन ढकालले एक विकेट लिए ।

त्यसअघि टस हारेर ब्याटिङमा आएको वाग्मतीले निर्धारित २० ओभरमा सात विकेट गुमाएर १८४ रनको योगफल खडा गरेको थियो ।

वाग्मतीका ओपनर रित गौतमले ५३ बलमा आठ चौका र तीन छक्कासहित ७४ रन बनाएका थिए । सुभ कंसाकारले २७, कप्तान सन्दीपले १८, गौरभ खड्काले १७ र प्रतिक श्रेष्ठले १४ रन थपे ।

आजदेखि प्रतियोगितामा कुल १२ टिम सहभागी छन् । जसलाई प्रत्येक समूहमा तीन टिम रहने गरी चार समूहमा विभाजन गरिएको छ । प्रतियोगिताको समूह ‘ए’ मा वाग्मती प्रदेशसँगै, कर्णाली प्रदेश, मदन भण्डारी स्पोर्ट्स एकेडेमी रातो छन् ।

समूह ‘बी’मा सशस्त्र प्रहरी बलको एपीएफ क्लब, गण्डकी प्रदेश र लुम्बिनी प्रदेश छन् । यस्तै, समूह ‘सी’मा नेपाल पुलिस क्लब, मधेस प्रदेश र सुदूरपश्चिम प्रदेश छन् । समूह ‘डी’मा त्रिभुवन आर्मी क्लब, कोसी प्रदेश र मदन भण्डारी स्पोर्ट्स एकेडेमी निलो छन् ।