काठमाडौं । टिकटक बन्द गर्ने सरकारको निर्णयविरुद्ध युवाहरुको एक समूहले काठमाडौंको माइतीघरमा प्रदर्शन गरेका छन् । जनताको बोल्ने अधिकार सुनिश्चित गर भन्दै उनीहरुले टिकटक प्रतिबन्धविरुद्ध काठमााडौंको माइतीघर मण्डलामा प्रदर्शन गरेका हुन् ।

प्रदर्शनमा सहभागी युवाले ‘सरकार हिजो बन्दुकसँग डराउने, आज टिकटकसँग’, ‘टिकटक बन्द हैन, भ्रष्टाचार बन्द गर’, ‘गरिखाने मर्दै छ सरकार’, ‘टिकटक हैन, जाजरकोटलाई ध्यान दे’लगायतका प्लेकार्ड प्रदर्शन गरेका थिए ।

उनीहरुले टिकटक बन्द नभएर सरकारले आवश्यक नियमन गर्नुपर्नेमा जोड दिएका थिए ।

सरकारले टिकटक बन्द गरेपछि यसको पक्ष र विपक्षमा बहस भइरहेको छ । सरकारको निर्णयविरुद्ध सर्वोच्च अदालतमा आधा दर्जन बढी रिट दर्ता भएको छ । टिकटक प्रतिबन्ध लगाउने सरकारको निर्णयविरुद्धका रिट सोमबार भने हेर्न नभ्याइने सूचीमा परेका छन् ।