काठमाडौं । आईसीसी एकदिवसीय विश्वकपमा भारतका विराट कोहली ‘मोस्ट कन्सिसटेन्ट प्लेयर’ बनेका छन् । 

प्रतियोगिताको सर्वाधिक रनकर्ता रहेका कोहलीले ११ खेलमा ७६५ रन बनाए । उनले यसक्रममा तीन शतक र ६ अर्धशतक प्रहार गरे । विराटपछि सबैभन्दा धेरै रन बनाउने खेलाडी भारतीय टिमकै कप्तान रोहित शर्माले ५९७ रन बनाए ।

यस्तै, भारतीय टिमकै बलर मोहम्मद सामी प्रतियोगितामा सबैभन्दा धेरै विकेट लिने खेलाडी बनेका छन् । सामीले सात खेल खेल्दा २४ विकेट लिए । सामीपछि दोस्रो स्थानमा रहेका अस्ट्रेलियाका एडम जाम्पाले २३ विकेट लिए ।

प्रतियोगितामा अपराजित रहँदै फाइनल प्रवेश गरे पनि फाइनलमा भने त्यो लय कायम राख्न नसक्दा भारतले उपविजेतामा चित्त बुझाउनुपरेको हो ।

आइतबार भारतको अहमदाबादस्थित नरेन्द्र मोदी रंगशालामा भएको फाइनलमा घरेलु टिमले दिएको २४१ रनको लक्ष्य ४३ ओभरमा पूरा गर्दै अस्ट्रेलियाले छैटौँपटक उपाधि जितेको थियो ।