काठमाडौं । आईसीसी एकदिवसीय विश्वकपको फाइनलमा अस्ट्रेलियाविरुद्ध ब्याटिङमा संघर्षरत देखिएको भारतबाट विराट कोहलीले अर्धशतक बनाएका छन् ।

नरेन्द्र मोदी रंगशालामा जारी खेलमा टस हारेर ब्याटिङमा उत्रिएको भारतका निम्ति कोहलीले ५६ बलमा चार चौकासहित ५० रन पूरा गरे । एकदिवसीय अन्तर्राष्ट्रिय क्रिकेटमा कोहलीको यो ७२औँ अर्धशतक हो ।

जारी खेलको २५.१ ओभर सकिँदा भारतले तीन विकेट गुमाएर १३२ रन बनाएको छ । कोहलीसँगै क्रिजमा रहेका केएल राहुल २५ रनमा खेलिरहेका छन् ।

त्यसअघि, भारतका ओपनरद्वय कप्तान रोहित शर्माले ४७ रन जोड्दा शुभमन गिल र श्रेयस ऐयरले समान चार रन बनाएका थिए ।

अस्ट्रेलियाका ग्लेन म्याक्सवेल, मिचेल स्टार्क र कप्तान प्याट कुमिन्सले समान एक विकेट लिए ।

दुवै टिम प्रतियोगिताको १३औँ संस्करणमा आफूलाई विजेता बनाउने लक्ष्यसहित मैदानमा उत्रिएका छन् । हालसम्म भारतले दुई र अस्ट्रेलियाले पाँचपटक विश्वकपको उपाधि जितेका छन् ।

विश्वकपको फाइनलमा स्थान बनाउने क्रममा भारतले न्युजिल्यान्डलाई ७० रनले र अस्ट्रेलियाले दक्षिण अफ्रिकालाई तीन विकेटले हराएको थियो ।

प्रतियोगितामा भारत एक मात्र अपराजित टिम हो । भारतले समूह चरणको खेलमा अस्ट्रेलियाविरुद्ध ६ विकेटको जित निकालेको थियो ।