![कोसी मन्त्रिपरिषद्को बैठक महिनाको एउटा धनकुटामा राख्ने](https://12khari.top/uploads/posts/Dhankuta-Toli-1700202292.jpg)
विराटनगर । कोसी प्रदेश सरकारले महिनाको एउटा मन्त्रिपरिषद् बैठक धनकुटामा राख्ने भएको छ ।
धनकुटामा मुख्यमन्त्रीको सम्पर्क कार्यालय छ । तत्कालीन मुख्यमन्त्री शेरधन राईले कार्यालय स्थापना गरेका थिए । तर, पहिलो कार्यकालमा त्यहाँ एउटा पनि बैठक बसेन । त्यहाँ सहायक कर्मचारीको भरमा कार्यालय संचालित छ ।
कोसीका मुख्यमन्त्री केदार कार्कीले धनकुटाबाट ज्ञापन पत्र बुझाउन आएका प्रतिनिधि मण्डललाई प्रत्येक महिनाको मन्त्रिपरिषद्को बैठक कम्तीमा एक पटक राख्ने बताएका छन् । धनकुटाले राजधानीको माग गर्दै लामो समय आन्दोलन गरेको थियो । तर, प्रदेशसभाले विराटनगर तोक्यो । त्यसपछि विगतको क्षेत्रीय सदरमुकाममा मुख्यमन्त्री कार्यालय स्थापना गरिएको थियो ।
नेपाली कांग्रेस धनकुटाको टोली विकास र समृद्धिका लागि कार्यक्रम माग गर्दै शुक्रबार मुख्यमन्त्री कार्कीसँग भेटघाट गर्न आएका थिए । नेपाली कांग्रेस धनकुटाका सचिव विजय सन्तोषी राईले भने, “महिनामा एउटा बैठक धनकुटामै गर्ने मुख्यमन्त्रीले प्रतिवद्धता जनाउनु भएको छ ।”
कांग्रेस टोलीले कोसी प्रदेशका मन्त्रीहरू समशेर राई र कमलप्रसाद जबेगुसँग पनि भेटघाट गरी आफ्ना माग राखेको छ । मुख्यमन्त्रीको सम्पर्क कार्यालयलाई साधन स्रोत र जनशक्तियुक्त बनाउनु पर्ने, मन्त्रिपरिषद्को बैठक धनकुटामा राख्नुपर्ने, धनकुटा अस्पतालको स्तरोन्नति हुनुपर्नेलगायत माग प्रदेश सरकारसमक्ष राखिएको राईले बताए ।