काठमाडौं । नेपाली सेनाले ४८ वर्षअघि सुरु गरेको सैनिक कल्याणकारी कोषको सम्पत्ति अहिले ७७ अर्ब ६१ करोड एक लाख रुपैयाँ पुगेको छ । सेनाका अनुसार ०३२ सालमा सैनिक कल्याणकारी कोष स्थापना भएको थियो ।

बहालवाला सैनिक, भूतपूर्व र तिनका आश्रित परिवारको बृहत्तर हितलाई दृष्टिगत गरी ४८ वर्षअघि कोषको स्थापना गरिएको थियो ।

संयुक्त राष्ट्रसंघको आह्वानमा विश्व शान्ति स्थापनार्थ विभिन्न द्वन्द्वग्रस्त मुलुकमा सहभागी भएबापत प्राप्त करिब एक करोड २५ लाख रुपैयाँ राखी सो कोष स्थापना गरिएको थियो । आर्थिक वर्ष २०८०/८१ सम्म आइपुग्दा सैनिक कल्याणकारी कोषको सम्पत्ति ७७ अर्ब ६१ करोड एक लाख पुगेको सेनाले जनाएको छ ।

गएको असार मसान्तसम्म कोषमा नगद मौज्दात ७१ अर्ब पाँच करोड ६१ लाख रुपैयाँ थियो । कोषले विभिन्न क्षेत्रमा ६ अर्ब ५५ करोड ४० लाख रुपैयाँ लगानी गरेको सेनाले जनाएको छ ।

कोषका हिताधिकारीको संख्या करिब १० लाख छ । कोषलाई बढी प्रभावकारी बनाउन ‘कल्याणकारी भिजन–२०३०’ तयार गरी कल्याणकारी कार्यक्रम सञ्चालन गर्दै आएको सेनाले जनाएको छ ।

कोषले हिताधिकारीको स्वास्थ्य र शिक्षालाई विशेष प्राथमिकता दिँदै आएको छ ।

 कोषमा ०७० सम्म २३ अर्ब ३० करोड रुपैयाँ जम्मा भएको थियो भने ०७४ सालमा यो रकम बढेर ३४ अर्ब ५६ करोड रुपैयाँ पुगेको थियो ।

पछिल्ला पाँच वर्षमा कोषमा रकम दुईगुनाभन्दा बढीले बढेको छ । ०७५ सालमा ३५ अर्ब ७७ करोड रहेको कोषको सम्पत्ति ०८० मा आइपुग्दा बढेर ७७ अर्ब ६१ करोड रुपैयाँ नाघेको छ । पछिल्ला वर्षहरूमा कोषको सम्पत्ति वार्षिक करिब १० अर्ब रुपैयाँका दरले बढेको छ ।