काठमाडौं । नेपाली महिला क्रिकेट टोलीकी कप्तान इन्दु बर्माले चार देश सम्मिलित महिला ट्वान्टी–२० क्रिकेट शृंखलामा आफूहरूले राम्रो प्रदर्शन गर्ने आशा व्यक्त गरेकी छन् । नेपाली टोलीले यही कात्तिक २९ गतेदेखि हङकङमा चार देश सम्मिलित महिला ट्वान्टी–२० शृंखला खेल्दै छ ।

त्यसका निम्ति टोलीले त्रिवि क्रिकेट मैदानमा छोटो तयारी गरेको थियो । टोली आइतबार त्यसतर्फ प्रस्थान गर्दै छ । नेपाल क्रिकेट संघ (क्यान)ले शनिबार एक कार्यक्रमको आयोजना गर्दै उनीहरूलाई बिदाइ गर्‍यो ।

सो अवसरमा सञ्चारकर्मीसित नवनियुक्त कप्तान इन्दुले आफ्ना निम्ति समेत अवसरका रूपमा रहेको शृंखलामा राम्रो प्रदर्शन गर्ने आशा व्यक्त गरेकी हुन् ।

११ वर्षयता नेपालको कप्तानी समाल्दै आएकी रुविना क्षेत्रीलाई हटाउँदै क्यानले यसै साता इन्दुलाई नेतृत्वको जिम्मेवारी दिएको हो । इन्दुका निम्ति यो शृंखला पहिलो परीक्षा समेत हुनेछ ।

यसलाई चुनौतीका रूपमा लिएको इन्दुले बताइन् । पछिल्लो समय कमजोर पक्षमा ध्यान दिएको उनले उल्लेख गरिन् । विशेष गरी फिल्डिङ र फिटनेसमा काम गरिएको उनको भनाइ छ ।

अन्तिम समयमा मात्र नेपालका प्रशिक्षक नियुक्त गरिएको थियो । क्यानका सचिव पारस खड्कानिकट मानिएका झापाका मनोज कटुवालले महिला क्रिकेट टोली प्रशिक्षणको जिम्मेवारी पाएका हुन् ।

नवनियुक्त प्रशिक्षक कटवालले पनि ६/७ दिनको तयारीबाट चुनौती धेरै भए पनि च्याम्पियन भएर फर्कने आशा व्यक्त गरे ।

शनिबार क्यानले मूलपानीस्थित मुख्यालयमा कार्यक्रम गरी टोलीको बिदाइ गरिएको हो । सचिव खड्का तथा सदस्यद्वय दिवाकर घले र सुदीप शर्माले बिदाइ गरेका थिए ।

सचिव खड्काले खेलाडीलाई उत्कृष्ट प्रदर्शन गर्दै च्याम्पियन भएर घर फर्कन शुभकामना दिए । पुरुष टोलीले झैँ सानदार प्रदर्शन गरेर च्याम्पियन हुनुपर्ने उनको भनाइ थियो ।

क्यानले उपकप्तानको जिम्मेवारी विन्दु रावललाई दिएको छ । नेपाली टोलीमा पूर्वकप्तान रुविना क्षेत्री, सीता रानामगर, खुसी डंगोल, सोमु विष्ट, संगीता राई, कञ्चन श्रेष्ठ, सोनी पाख्रिन, पूजा महतो, रोमा थापा, काजोल श्रेष्ठ, सम्झना खड्का र रुबी पोदार परेका छन् ।

शृंखला कात्तिक २९ देखि मंसिर ३ गतेसम्म सञ्चालन हुनेछ । शृंखलाका सबै खेल हङकङ क्रिकेट क्लबको मैदानमा आयोजना गरिएको छ ।

शीर्ष दुई टोली उपाधिका निम्ति भिड्नेछन् । पुछारका दुई टोलीले तेस्रो स्थान पाउन प्रतिस्पर्धा गर्नेछन् ।

शृंखलाको पहिलो खेलमा नेपालले तान्जेनियाको सामना गर्नेछ । नेपाल र तान्जेनियाबीचको खेल कात्तिक २९ गते हुनेछ । नेपालले कात्तिक ३० गते आयोजक हङकङ र मंसिर २ गते जापानको सामना गर्नेछ । तान्जेनिया र जापान नेपालसामु नयाँ प्रतिद्वन्द्वी हुन् । न्युज एजेन्सी नेपाल