![नयाँ स्टक एक्सचेन्जबारे स्वर्णिम वाग्लेको फरक मतमा के छ ?](https://12khari.top/uploads/posts/Swarnim Wagle1682681430.jpg)
काठमाडौं । राष्ट्रिय स्वतन्त्र पार्टी (रास्वपा) का सांसद डा. स्वर्णिम वाग्लेले नयाँ स्टक एक्सचेन्जको लाइसेन्स तत्काल दिन नहुने बताएका छन् ।
शुक्रबारको अर्थ समितिको बैठकमा उनले नयाँ स्टक एक्सचेन्ज स्थापनाको प्रक्रिया अगाडि बढाउने विषयमा सिद्धान्ततः असहमति नभए पनि थप छलफलको आवश्यक रहेको तर्क राखेका हुन् ।
अरू सांसदले कानुन अनुसार नयाँ स्टकको प्रक्रिया अगाडि बढाउन निर्देशन दिने विषयमा सहमति जनाएका छन् । तर, डा. वाग्लेले 'नोट अफ डिसेन्ट' लेखेका छन् ।
के छ वाग्लेको फरक मतमा ?
विधि पुर्याएर आर्थिक सुशासनका आधारभूत सिद्धान्तप्रति कटिबद्ध भएर विशुद्ध प्रतिस्पर्धाको कोणबाट दोस्रो स्टक एक्सचेन्ज स्थापनाको प्रक्रिया छिट्टै अगाडि बढाउन सिद्धान्ततः मेरो असहमति नभए पनि अर्थ समितिको २०८०/०२/२९ को निर्णयप्रति न्याय नहुने, आवश्यक सहजीकरण गरिदिन नेपाल धितोपत्र बोर्डले २०८०/०७/१६ मा पठाएको पत्र समितिमा अग्रिम पेस नगरी छलफल नगराई, हतार हतार २०८० को दीपावली सुरु हुनु अधि साँझको सात बजे खोटपूर्ण नियतका साथ संगठित तवरले हठात् निर्णय गरेको देखिने भएको र चाडपर्व पछि सार्थक छलफल गरी निर्णय लिँदा अर्थ समिति सन्देहको घेराबाट बाहिर हुने महसुस गरेकोले निर्णय २ प्रति मेरो फरक मत दर्ज गरेको छु ।