काठमाडौं । फ्रान्सका लेजेन्ड जिनेदिन जिदानले विश्व फुटबलमा अर्जेन्टिनी फरवार्ड लियोनल मेसीजस्तो कुनै पनि खेलाडी नभएको बताएका छन् ।

चर्चित स्पोर्ट्स वेयर कम्पनी एडिडासले फ्रान्सका विश्वकप विजेता जिदान र मेसीसँगको भिडियो सार्वजनिक गरेको छ । जसमा यी दुई विश्वकप विजेताले एक–अर्काको प्रशंसा गरेका छन् । 

“मेसीको प्रशंसाका लागि एकमात्र शब्द छ, ‘जादु’ । म र मेसी सँधै एकसाथ हुँदैनौँ । त्यसकारण आज मेरो लागि विशेष दिन हो । किनकी आज म उसको कति प्रशंसा गर्छु भन्ने बताउन सक्छु । फुटबल बुझ्ने र केही फरक रूपमा फुटबल खेल्नेहरूका लागि मेसीको प्रदर्शन शुद्ध जादु हो,” जिदानले भने, “जादुको अर्थ उसलाई बल आफूमा आइपुग्नुअघि नै अब के गर्नुपर्छ भन्ने थाहा हुन्छ । र, एक फुटबल बुझ्ने खेलाडीका रूपमा मलाई मैदानमा मेसीले अब के गर्छन् भन्ने थाहा हुन्छ । मेसीले मैदानमा गरेका कुराहरू हेर्दा मसँग कुनै शब्द नै हुँदैनन् । र, समर्थकहरू पनि फुटबलमा यही हेर्न चाहन्छन् । यसरी मैदानमा जादु गर्न सक्ने निक्कै कम खेलाडी छन्, तर मेसीजस्ता कोही छैनन् । त्यहाँ मेसीमात्र छन् ।”

एडिडासको यो भिडियोमा अर्जेन्टिनी फरवार्ड मेसीले पनि जिदानको तारिफमा शब्द खर्चिएका छन् ।

“म उनको धेरै प्रशंसा गर्छु । तर, हामी एकसाथ खेल्न पाउने भाग्यमानी बन्न सकेनौँ । तर, हामीले एकअर्काविरुद्ध खेल्न पायौं । उनले के गरे र अझै गर्दैछन् भन्ने कुरामा मेरो सँधै सम्मान छ,” जिदानबारे मेसीले भने, “मेरो लागि उनी सर्वकालीन महान् खेलाडीमध्येका एक हुन् । मड्रिडमा हुँदा मैले उनको पथलाई पछ्याए पनि । फरक, सुरुचीपूर्ण, अग्लो, जादू उनीसँग सबै थियो ।”