काठमाडौं । नेकपा (एकीकृत समाजवादी)का अध्यक्ष माधवकुमार नेपालले वर्तमान राजनीतिक व्यवस्था जोगाउनका लागि पार्टीहरूका बीचमा एकता र आपसी सहकार्यको आवश्यकता रहेको बताएका छन् ।

मंगलबार सर्वदलीय बैठकमा सहभागी भएर निस्किने क्रममा सञ्चारकर्मीहरूसँग कुराकानी गर्दै अध्यक्ष नेपालले वर्तमान राजनीतिक व्यवस्थालाई जोगाउनका लागि पार्टीहरूका बीचमा आपसी सहकार्य र एकता आवश्यक रहेको बताएका हुन् । 

जनजीविकाको सवालमा पार्टीहरूले देश र जनताको हितलाई सर्वोपरी राखेर अगाडि बढ्नुपर्ने उनको भनाइ थियो । उनले संघीय लोकतान्त्रिक गणतन्त्रात्मक व्यवस्था परिवर्तनको आवश्यक नभएको पनि बताए । वर्तमान व्यवस्थामा सुधारको भने खाँचो रहेको औँल्याए ।

"त्यतिखेर हामीले जुन मान्यता अगाडि सारेका थियौँ, त्यो मान्यता अनुरुप अगाडि बढ्यौँ । जनताको सहयोग, समर्थन, अनुमोदन पनि रह्यो । संविधान निर्माण गर्‍यौँ । व्यवस्थालाई परिवर्तन गर्‍यौँ । गणतन्त्र ल्यायौँ," उनले भने, "व्यवस्था परिवर्तनको आवश्यकता छैन । व्यवस्था सुधारको आवश्यकता छ । व्यवस्था र अवस्थाको बारेमा मान्छेहरूको जुन भाष्य छ, त्यो भाष्य उपयुक्त होइन । व्यवस्थामा पनि सुधार गर्नुपर्छ ।"