काठमाडौं । चालु आर्थिक वर्ष २०८०/०८१ को पहिलो त्रैमासमा २० वाणिज्य बैंकको नाफा औसतमा ३५.९३ प्रतिशतले घटेको छ । 

गत आवको पहिलो त्रैमासको तुलनामा चालु आवको सोही अवधिमा नाफा तीन अर्ब तीन करोड ९६ लाख रुपैयाँ घटेको हो । 

चालु आवको पहिलो त्रैमासमा वाणिज्य बैंकले १३ अर्ब ५१ करोड १० लाख रुपैयाँ नाफा आर्जन गरेका छन् । गत आवको पहिलो त्रैमासमा भने वाणिज्य बैंकहरूले १६ अर्ब ५५ करोड सात लाख रुपैयाँ नाफा आर्जन गरेका थिए । यो वर्षको असोज मसान्तसम्म सबै वाणिज्य बैंकहरूको खराब कर्जा वृद्धि भएकाले पनि नाफामा असर परेको देखिन्छ । 

गत वर्षको असोजको तुलनामा खराब कर्जा वृद्धि भएको भए पनि हिमालयन बैंकको नाफा भने सर्वाधिक वृद्धि भएको छ । यो बैंकले पहिलो त्रैमासमा एक अर्ब पाँच करोड ६१ लाख रुपैयाँ आर्जन गरेको छ । 

गत आवको पहिलो त्रैमासमा यो बैंकले ५३ करोड २४ लाख रुपैयाँ आर्जन गरेको थियो । यो बैंकले सिभिल बैंकलाई प्राप्ति गरेकाले पनि नाफामा उलेख्य सुधार देखिएको हो । गत आवको पहिलो त्रैमासको तुलनामा यो बैंकको नाफा ९८.५३ प्रतिशतले वृद्धि भएको हो । 

यो वर्षको पहिलो त्रैमासमा सर्वाधिक नाफा गर्नेमा नेपाल इन्भेष्टमेन्ट मेगा बैंक भएको छ । यो बैंकले एक अर्ब ५२ करोड २२ लाख रुपैयाँ नाफा आर्जन गरेको छ । यो बैंकको नाफा गत आवको तुलनामा ३३.४७ प्रतिशतले वृद्धि भएको हो । 

त्यसैगरी यो आवको पहिलो त्रैमासमा नबिल बैंक बढी नाफा आर्जन गर्नेमा दोस्रो भएको छ । नबिलले चालु आवको पहिलो त्रैमासमा एक अर्ब ४६ करोड रुपैयाँ नाफा आर्जन गरेको छ । गत आवको पहिलो त्रैमासको तुलनामा यो बैंकको नाफा ६.५१ प्रतिशतले घटेको छ । गत वर्षको सोही अवधिमा यो बैंकले एक अर्ब ५७ करोड रुपैयाँ नाफा आर्जन गरेको थियो । 

२० वाणिज्य बैंकमध्ये नाफा ऋणात्मक हुनेमा कृषि विकास बैंक छ । यो बैंक असोज मसान्तसम्म ८८ करोड ८० लाख रुपैयाँ नोक्सानीमा छ । गत वर्षको सोही अवधिमा यो बैंक २२ करोड ९ लाख रुपैयाँ नाफामा थियो ।  

सात वाणिज्य बैंकको नाफा एक अर्बभन्दा बढी 
चालु आवको पहिलो त्रैमासमा सात वटा वाणिज्य बैंकले एक अर्बभन्दा बढी नाफा आर्जन गरेका छन् । यसरी एक अर्बभन्दा बढी नाफा आर्जन गर्नेमा एनआईसी एसिया, नबिल, हिमालयन, ग्लोबल आइएमई, नेपाल इन्भेष्टमेन्ट, प्राइम कमर्सियल र प्रभु बैंक रहेका छन् । 

पहिलो त्रैमासमा एनआईसी एसियाले एक अर्ब एक करोड रुपैयाँ नाफा आर्जन गरेको छ भने नबिलले एक अर्ब ४६ करोड, हिमालयनले एक अर्ब पाँच करोड नाफा आर्जन गरेका छन् ।

त्यस्तै, ग्लोबल आइएमईले एक अर्ब २२ करोड, नेपाल इन्भेष्टमेन्टले एक अर्ब ५२ करोड, प्राइम कमर्सियलले एक अर्ब १५ करोड र प्रभुले एक अर्ब तीन करोड रुपैयाँ नाफा आर्जन गरेका छन् । 

१२ वाणिज्य बैंकको नाफा घट्यो 
चालु आवको पहिलो त्रैमासमा २६ वाणिज्य बैंकमध्ये १२ वटाको नाफा घटेको छ । जसमा ५० प्रतिशतभन्दा बढी नाफा घट्नेमा पाँच वटा वाणिज्य बैंक छन् । 

५० प्रतिशतभन्दा बढी नाफा घट्नेमा कृषि विकास, सिद्धार्थ, लक्ष्मी सनराइज, नेपाल बैंक र कुमारी बैंक छन् । गत आवको पहिलो त्रैमासको तुलनामा कृषि विकासको नाफा ५०१.९३ प्रतिशत, सिद्धार्थको ९१ प्रतिशत, लक्ष्मी सनराइजको ७९.५३ प्रतिशत, नेपाल बैंकको ७६.४३ प्रतिशत र कुमारी बैंकको ७३.६४ प्रतिशत घटेको हो ।