काठमाडौं । संस्कृति, पर्यटन तथा नागरिक उड्डयनमन्त्री सुदन किरातीले विश्व समुदायमा नयाँ ढंगले ‘ब्राण्डिङ’ गर्नसके पर्यटनबाट समृद्धि सम्भव रहेको बताएका छन् । बुधबार नेपाल पर्वतारोहण संघको ५०औँ वार्षिकोत्सवमा बोल्दै उनले यस्तो बताएका हुन् । 

जलवायु परिवर्तनले हिउँ पग्निने, हिमपहिरो जाने र  हिमाल कालो भएको दृश्य देखिदै गएको मन्त्री किरातीले बताए । हिमालको रक्षा गर्न सकेमात्र नेपाल रहने उनको भनाइ छ । 

“पर्यटनको मौलिकता हुन् । यसलाई हामीले विश्व समुदायमा नयाँ ढंगले ब्राण्डिङ गर्नसक्यौँ भने पर्यटनबाट समृद्धि सम्भव छ । पृथ्वीको हिमाल जलवायुको प्रतिक पनि रहेछ । जलवायुमा परिवर्तन हुँदै जाँदा हिमाल कालो हुँदै आउने दृश्यहरू हामीले देखेका छौँ,” उनले भने, “संयुक्त राष्ट्रसंघका महामहिम महासचिवले हिजो संसद्‌मा विशेष महत्व दर्शाउँदै हिमाल असामान्य रूपमा पग्लिरहेको छ भन्नुभयो । नेपालले ३० वर्षदेखि यता धेरै ठूला विनाशकारी घटना व्यहोरिरहेको छ । समुन्द्रमा पानीको सतह बढीरहेको छ । संस्कृतिले ठूलो चुनौती व्यहोरिरहेको छ । हिउँ पहिरो बढी जाने सम्भवाना बढेको छ । जलवायु परिवर्तनको समाधान विश्वको साझा चुनौती बनेको छ । हामीले हाम्रो देशको हिमालको रक्षा गर्नसक्यौँ भने मात्रै नेपाल रहन्छ ।”

निषेधित क्षेत्रका कारण पर्यटनमा असहजता भइरहेको बताए । 

“पर्यटन ऐनहरू पुरानो छ, समय सापेक्ष गर्नुपर्ने छ । जहाजको भाडा विदेशी पाहुनालाई दोब्बर गरेका छौँ । त्यसले नकारात्मक सन्देश विश्वमा गइरहेको छ । निषेधित क्षेत्रका कारण पर्यटनमा धेरै ठूलो असहजता छ,” उनले भने ।