काठमाडौं । बिरामीको चापलाई ध्यानमा राख्दै कान्ति बाल अस्पतालले इमर्जेन्सी र ओपीडी सेवालाई व्यवस्थित गर्न थालेको छ । बालिका मृत्युको घटनापछि अस्पतालले सेवा सुधार गरेको हो । इमर्जेन्सी कक्षमा पालो कुर्दाकुर्दै मकवानपुरकी पाँच वर्षीया रेजिशा गोपालीको भदौ १८ गते मृत्यु भएको थियो ।
इमर्जेन्सीमा पुग्ने बिरामीका लागि अहिले ट्रायज (बिरामीको गम्भीरताका आधारमा वर्गीकरण गरिने स्थान)मा अवस्था छुट्याएर टिकट दिने व्यवस्था मिलाइएको छ । ट्रायजमा बस्ने नर्सले बिरामीको अवस्था हेरी सिकिस्तलाई रातो स्टिकर दिन्छन् । यस्ता बिरामीलाई इमर्जेन्सीमा खटिएका चिकित्सकोमा पुर्याइन्छ ।
पहेँलो स्टिकर दिइएका बिरामीलाई तीनदेखि चार घण्टाभित्र परीक्षण गर्ने र हरियो स्टीकर दिइएकालाई पहेँलोवाला बिरामी सकिनासाथ जाँच्ने प्रवन्ध गरिएको अस्पताल निर्देशक डा. पंकज रायले बताए ।
इमर्जेन्सी अगाडि भीड बढेपछि कान्तिले लाइन बस्ने जोन पछाडि सारेको छ । इमर्जेन्सी टिकटका लागि अतिरिक्त दिवा सेवा काउन्टर थप गरिएको छ । यो काउन्टरले बिहान ९ देखि दिउँसो ३ बजेसम्म सेवा दिँदै आएको छ ।
ओपीडीका लागि भने १ बजेसम्म मात्रै काउन्टर सञ्चालन हुँदै आएको छ ।
इमर्जेन्सी सेवालाई लक्षित गरी काउन्टर अगाडि नै फार्मेसी सञ्चालन गरिएको छ । योसँगै अस्पतालका दुईवटा फार्मेसी चौबीसै घण्टा सञ्चालन भइरहेका छन् ।
इमर्जेन्सी कक्षमा बिरामीको चापलाई मध्यनजर गर्दै १० देखि १५ जना कन्सल्टेन्ट चिकित्सक ‘स्ट्यान्डबाइ’ (तैनाथ) राख्न थालिएको निर्देशक डा. रायले बताए । ती चिकित्सक एकै फ्लोरका विभिन्न विभागमा खटिए पनि इमर्जेन्सीलाई प्राथमिकता दिइने उनको दाबी छ ।
दैनिक दुई युनिट चिकित्सक र नर्स इमर्जेन्सीमा राखिएको छ । ड्युटीका कर्मचारीको निगरानीका लागि ५ देखि १० बजेसम्म सुरपरभाइजर खटाइएको छ । प्रशासनसहितको टोलीले प्रत्येक आइतबार र बुधबार विभिन्न विभागको अनुगमन गर्दै आएको छ ।
अस्पतालको सेवा व्यवस्थित गर्न सुधारका केही काम गरिए पनि जनशक्ति र पूर्वाधार पर्याप्त नहुँदा अझै चुस्त बनाउन नसकिएको डा. राय बताउँछन् । बिरामीको चाप भएको अवस्थामा एउटै इमर्जेन्सी बेडमा तीन जनासम्म बिरामी राख्नुपर्ने अवस्था रहेको उनको भनाइ छ ।
कान्तिमा गर्मीयाममा आठ सयदेखि नौ सयको हाराहारी बिरामी ओपीडीमा र १५० देखि २०० बिरामी इमर्जेन्सीमा आउँछन् । हाल चलिरहेको २५ वटा इमर्जेन्सी बेड बिरामीको चापअनुसार पर्याप्त नभएको उनी बताउँछन् ।
जनशक्ति अभावले पनि सेवामा कठिनाइ निम्त्याइरहेको उनको भनाइ छ । कान्तिमा ८५ जना मेडिकल अफिसरको दरबन्दी रहे पनि ७२ जना मात्रै कार्यरत छन् । १७० नर्स र ३७ कन्सल्टेन्ट चिकित्सक कार्यरत छन् । अहिलेको संख्यामा बिरामीका लागि नर्सिङ जनशक्ति मात्रै ६ सय आवश्यक रहेको निर्देशक राय बताउँछन् ।
-1706524096.JPG)
