काठमाडौं । आईसीसी ट्वान्टी–२० विश्वकप एसिया छनोटमा बहराइनले हङकङविरुद्ध २० रनको जित निकालेको छ ।

मंगलबार मुलपानीस्थित माथिल्लो मुलपानी क्रिकेट मैदानमा सम्पन्न खेलमा बहराइनले प्रस्तुत गरेको १४७ रनको लक्ष्य पछ्याउने क्रममा हङकङ १९.१ ओभरमा १२६ रनमै समेटियो ।

हङकङका अंशुमान रथले २८ रन बनाए । जिसान अलीले २१, ऐजाज खानले नस्रुल्ला रानाले १६ रन थपे । यसबाहेक, हङकङका अन्य ब्याटरले दोहोरो अंकमा रन जोड्न सकेनन् ।

बहराइनका अब्दुल मजिदले तीन विकेट लिए । मजिदले ३.१ ओभरमा सात रनमात्र खर्चिए । अली दाउद र रिजवान बटले समान दुई विकेट लिए । सथैया विरापथिरन र इमरान अन्वरले एक–एक विकेट लिए ।

त्यसअघि, टस हारेर ब्याटिङमा आएको बहराइनले १९.३ ओभरमा सबै विकेट गुमाएर १४६ रनको योगफल खडा गरेको थियो ।

बहराइनका इमरान अलीले ६२ रन बनाएका थिए । उनले ४३ बलमा पाँच चौका र तीन छक्का प्रहार गरे । इमरान अन्वरले १५, हैदन बटले १४ र रिजवान बटले १३ रन जोडे ।

हङकङका नस्रुल्ला रानाले तीन विकेट लिएका थिए । ऐजान खान, इशान खान र यासिम मुर्तजनाले समान दुई विकेट लिए ।

सोमबारदेखि सुरु भएको प्रतियोगितामा बहराइनको यो पहिलो जित हो । दुई खेलबाट दुई अंक जोडेको बहराइन यो जितसँगै समूह ‘बी’को दोस्रो स्थानमा उक्लिएको छ । बहराइन यसअघि पहिलो खेलमा यूएईसँग पाँच विकेटले पराजित भएको थियो ।

हङकङको भने यो पहिलो हार हो । समान खेलबाट दुई अंक जोडेको हङकङ तेस्रो स्थानमा छ । हङकङले यसअघि पहिलो खेलमा कुवेतलाई १६ रनले हराएको थियो ।

मंगलबार नै कीर्तिपुरस्थित त्रिवि क्रिकेट मैदानमा भएको समूह ‘ए’को खेलमा ओमानले सिंगापुरलाई २२ रनले हराएको छ । प्रतियोगितामा लगातार दोस्रो जित निकालेको ओमान दुई खेलबाट चार अंकसहित समूह ‘ए’को शीर्ष स्थानमा उक्लिएको छ । ओमानले यसअघि पहिलो खेलमा मलेसियालाई ३२ रनले हराएको थियो ।

सिंगापुरको भने यो लगातार दोस्रो हार हो । दुई खेल खेल्दा पनि अंकविहीन सिंगापुर तालिकाको पुछारमा छ । सिंगापुर यसअघि पहिलो खेलमा नेपालसँग आठ विकेटले पराजित भएको थियो ।