काठमाडौं । एर्लिङ हाल्यान्डप्रेरित म्यानचेस्टर सिटीले ‘म्यानचेस्टर डर्बी’मा म्यानचेस्टर युनाइटेडविरुद्ध ३–० को सहज जित निकालेको छ ।

आइतबार राति युनाइटेडको घरेलु मैदान ओल्ड ट्राफोर्डमा सिटीलाई जित दिलाउन हाल्यान्डले दुई गोल गरे । सिटीबाट अर्काे गोल फिल फोडेनले गरेका थिए ।

खेलको २६औँ मिनेटमा पेनाल्टीमार्फत गोल गर्दै हाल्यान्डले सिटीलाई अग्रता दिलाएका थिए । युनाइटेडका रास्मस होजलुन्डको ‘ह्यान्ड’ भएपछि भिडियो सहायक रेफ्री (भार)को सहायतामा सिटीले पेनाल्टी पाएको थियो । जसलाई हाल्यान्डले सहजै पोस्टको दिशा दिए ।

४९औँ मिनेटमा हाल्यान्डले नै सिटीको अग्रता दोब्बर पारे । ८०औँ मिनेटमा फोडेनले गोल गरेपछि सिटीले ३–० को जित निश्चित गर्‍यो ।

जितपछि सिटी तेस्रो स्थानमा छ । सिटीले १० खेलबाट २४ अंक जोडेको छ । समान खेलबाट २६ अंकसहित टोटनहम शीर्ष स्थानमा छ । १५ अंकको युनाइटेड आठौँ स्थानमा छ ।

आइतबार राति नै भएका अन्य खेलमा लिभरपुलले नटिंघम फोरेस्टलाई ३–० ले, वेस्ट हमलाई एभर्टनले १–० ले, एस्टन भिल्लाले लुटन टावनलाई ३–१ ले हराए । ब्राइटन र फुलहमले १–१ को बराबरी खेल्दै अंक बाँडे ।