काठमाडौं । चालु आर्थिक वर्ष २०८०/८१ को तीन महिनामा चार खर्ब सात अर्ब ७५ करोड ८९ लाख रुपैयाँको सामान आयात गरिएको छ । भन्सार विभागले आइतबार सार्वजनिक गरेको तथ्यांकानुसार गत वर्षको तुलनामा आयात १.६९ प्रतिशतले वृद्धि भएको छ ।
गत वर्षको तीन महिनामा चार खर्ब ९९ करोड ८३ लाख रुपैयाँको वस्तु तथा सेवा आयात गरिएको थियो ।
यो अवधिमा ४० अर्ब ८७ करोड ४८ लाख रुपैयाँको वस्तु तथा सेवा निर्यात गरिएको विभागले जनाएको छ । गत वर्षको तुलनामा निर्यात भने २.२६ प्रतिशतले घटेको छ ।
गत वर्षको असोजसम्म ४१ अर्ब ८२ करोड एक लाख रुपैयाँको वस्तु तथा सेवा निर्यात गरिएको थियो ।
निर्यात घटेसँगै व्यापार घाटा बढेको छ । तीन महिनाको अवधिमा व्यापार घाटा २.१५ प्रतिशतले बढेको छ ।
विभागका अनुसार नेपालको व्यापार घाटा असोज मसान्तसम्म तीन खर्ब ६६ अर्ब ८८ करोड ४० लाख रुपैयाँ कायम भएको छ । गत वर्ष यस्तो व्यापार घाटा तीन खर्ब ५९ अर्ब १७ करोड ८१ लाख रुपैयाँ थियो ।
