काठमाडौं । मुगुको छायानाथरारा नगरपालिका–६, मन्दुका एकै परिवारका चारजनाको शव दुई दिनअघि शंकास्पद अवस्थामा फेला पर्‍यो । वैदेशिक रोजगारीका निम्ति कतार पुगेका दीपक बोहराकी श्रीमती २८ वर्षीया श्रीदेवी, ११ वर्षीय छोरा मनोज, नौ वर्षीया छोरी अप्सरा र आठमहिने छोरा रहरको शव फेला परेको हो ।

धारिलो हतियार प्रयोग गरेर उनीहरूको सामूहिक हत्या गरिएको प्रहरीले आशंका गरेको छ । गएको शुक्रबार प्रहरीले घरभित्र शव फेला पारेको थियो । त्यसको भोलिपल्ट अर्थात शनिबार मात्र शव उठाइएको थियो ।

नेपालगन्जबाट घटनास्थलमा लगिएको तालिमप्राप्त कुकुरसहितको अनुसन्धानपछि मात्र प्रहरीले शव परीक्षणका निम्ति अस्पतालमा पठाएको हो । उनीहरूका शव परीक्षण गर्न जिल्ला अस्पताल गमगढीमा पठाइएको छ । घटनास्थल सदरमुकामबाट करिब चार घण्टाको दूरीमा छ ।

शनिबार बिहान नेपालगन्जबाट पुगेको तालिमप्राप्त कुकुरको टोलीले कुनै ‘क्लु’ फेला पार्न सकेन । कुकुरबाहेक प्रदेश प्रहरी कार्यालय सुर्खेतबाट छुट्टै अनुसन्धान टोली समेत मुगु पुगेको छ । तर, प्रहरीले कुनै बलियो क्लु फेला पार्न सकेको छैन ।

जिल्ला प्रहरी कार्यालय मुगुका डीएसपी वीरेन्द्र थापाका अनुसार घटनास्थल प्रहरीले सुरक्षित राखेको छ । तर, घटना कात्तिक ८ गते भएको र प्रहरीले ढिलो सूचना पाउँदा अनुसन्धानमा केही समस्या देखिएको उनले बताए ।

“उनीहरूको धारिलो हतियार प्रयोग गरेर हत्या भएको जस्तो देखिन्छ । पोस्टमार्टम रिपोर्ट आएपछि थप पुष्टि हुन्छ । हामीले केही व्यक्तिमाथि आशंका गरेका छौँ, तर अहिले नै नियन्त्रणमा लिइहाल्ने बलियो प्रमाण फेला पारेका छैनौँ । कुकुरले पनि संकेत गर्न सकेन,” डीएसपी थापाले भने ।

मुगु प्रहरी स्रोतका अनुसार लुटपाट गर्ने उद्देश्यले हत्या गरिएको हुन सक्ने आशंका छ । श्रीदेवीले लगाएको सुनका गरगहना लुटेर लगेको खुलेको छ । श्रीदेवीले चलाउँदै आएको मोबाइल फोन समेत ‘हत्यारा’ले लिएको प्रहरीले दाबी गरेको छ ।

हत्यापछि श्रीमान् दीपकलाई पठाइएको थियो फोटो
श्रीदेवी छोराछोरीसहित कात्तिक ७ गते बडादसैँको टीका थाप्न छायानाथरारा–६, कोटिल्लास्थित माइतीघर पुगेकी थिइन् । उनीहरू दसैँको दिन टीका लगाएर त्यहीँ बसे । कात्तिक ८ गते आफ्नो घर फर्किएका थिए । सोही राति हत्या गरिएको प्रहरीको दाबी छ ।

कात्तिक १० गतेसम्म घरमा ताल्चा देखेपछि छिमेकीले त्यो फोडेका थिए । त्यसपछि श्रीदेवीसहित उनका तीन छोराछोरीका शव देखेका थिए । त्यसलगत्तै छिमेकीले प्रहरीलाई खबर गरेका थिए ।

प्रहरी घटनास्थलमा पुग्दा बिहानको साढे ९ बजेको थियो । प्रहरीले घटनाबारे अनुसन्धान गरिरहेकै बेला श्रीदेवीको मोबाइलबाट कतारमा रहेका उनका श्रीमान् दीपकलाई छोराछोरीको शवसहितको फोटो म्यासेन्जरमा पठाएको खुलेको छ ।

दीपकलाई फोटो पठाउँदाको मोबाइलको ‘बीटीएस’ प्रहरीले अध्ययन गरिरहेको छ । हत्यालगत्तै लुटेर लगेको मोबाइलको टावर भने घटनास्थलनजिकै देखिएको प्रहरी स्रोतको भनाइ छ ।

ढोकामा नयाँ ताल्चा
श्रीदेवी र उनका छोराछोरीको हत्यापछि घरको मूलढोकामा ताल्चा लगाइएको थियो । उक्त ताल्चा श्रीदेवीको घरमा लगाउने गरिएको नभएर अर्कै रहेको खुलेको छ । अनुसन्धानमा खटिएका प्रहरीका अनुसार हत्यापछि नयाँ ताल्चा लगाइएको खुलेको हो ।

श्रीदेवीले चार्जमा राखेको मोबाइल फोन समेत हत्यापछि लगेको खुलेको छ । त्यसको चार्जर रगत लागेको अवस्थामा फेला परेको छ ।

श्रीदेवीको घरनजिकै अरू तीन घर छन् । प्रहरीले स्थानीयसित सोधपुछ जारी राखेको छ ।