फ्र्यांकफर्ट । जर्मन कार निर्माता मर्सिडिज–बेन्जले केही पार्ट्सको कमीले कारको डेलिभरीमा भएको गिरावटका कारण तेस्रो त्रैमासिकमा कम्पनीको मुनाफामा कमी आएको बिहीबार जनाएको छ ।

जुलाईदेखि सेप्टेम्बरसम्मको आवधिमा खुद मुनाफा सात प्रतिशतले घटेर तीन अर्ब ७० करोड युरो भएको कम्पनीले एक विज्ञप्तिमा उल्लेख गरेको छ ।

यो वित्तीय डाटा फर्म फ्याक्टसेटले गरेको सर्वेक्षणमा विश्लेषकले गरेको भविष्यवाणीभन्दा केही राम्रो हो । विश्लेषकले समीक्षा अवधिमा कम्पनीको मुनाफा तीन अर्ब ४० करोड युरो हुने अनुमान गरेका थिए ।

उक्त अवधिमा कम्पनीको आम्दानी १.४ प्रतिशतले घटेर ३७ अर्ब २० करोड युरो भएको छ । केही पार्ट्सको कमीका कारण तेस्रो त्रैमासिकमा यात्रीवाहक कारहरूको बिक्री करिब ५ प्रतिशतले कम भएकाले आम्दानीमा पनि गिरावट आएको बताइएको छ ।

कोरोनाभाइरस महामारीको समयमा सुरु भएको आपूर्ति शृंखलाको समस्या अधिकांश कार निर्माताका निम्ति धेरै हदसम्म कम भएको छ । यद्यपि, उनीहरूले कहिलेकाहीँ यस्तो समस्याको सामना गर्नुपर्दा उत्पादन सुस्त भएको छ ।

तेस्रो त्रैमासिकमा मर्सिडिजको बिक्री ११ प्रतिशतले घटेको छ । यो अवधिमा विद्युतीय सवारीको बिक्री भने ६६ प्रतिशतले बढेको थियो । रासस/एएफपी