काठमाडौं । वाणिज्य, आपूर्ति तथा उपभोक्ता संरक्षण विभागको सहजीकरणमा नेपाल खुद्रा व्यापार संघले आफ्ना सदस्यहरूलाई चिनी उपलब्ध गराएको छ । बुधबार (हिजो)देखि संघले काठमाडौंका विभिन्न ठाउँमा सहुलियत मूल्यमा चिनी उपलब्ध गराउन थालेको हो ।

संघका कार्यवाहक अध्यक्ष नरेशबाबु शाहीका अनुसार बुधबार ३८० बोरा चिनी बजारमा पठाइएको छ । चिनीको एक बोरामा ५० केजी हुने उनले बताए ।

बिहीबार पनि चिनी लिन आउनेको भीड रहेको उनले जानकारी दिए । उपभोक्ताले प्रतिकिलो ११५ रुपैयाँ चिनी पाउने उनले उल्लेख गरे ।

“हामीले एभरेस्ट चिनी मिलबाट ३८० बोरा उठाएका छौँ । हामीलाई आपूर्ति विभागले सहजीकरण गरिदिएको हो । बुधबार हामीले काठमाडौंका विभिन्न ठाउँमा चिनी पठाएका छौँ,” उनले बाह्रखरीसित भने, “चिनीको कालोबजारी नहोस् भनेर हामीले अनुगमन पनि गरिरहेका छौँ । हामीले १११ रुपैयाँ ८५ पैसामा गरिद गरेर ढुवानी खर्च जोड्दा प्रतिकिलो ११४ रुपैयाँ पुगेको छ । तर, हामीले बजारमा ‘११५ मा नै बेच्नू’ भनेर भनेका छौँ । त्यसको अनुगमन पनि गर्छौँ ।”

बुधबार कीर्तिपुरका निम्ति ६० बोरा, नक्सालदेखि कालोपुसम्म ६५, मौतिदेवीमा ६५, असनमा पाँच, क्षेत्रपाटीमा ६० र नयाँ र पुरानो बानेश्वर क्षेत्रका निम्ति ६० बोरा चिनी पठाइएको उनले जानकारी दिए ।

यस्तै, लाजिम्पाटमा १० बोरा, चक्रपथदेखि बूढानीलकण्ठ क्षेत्रका निम्ति २० र कोटेश्वर क्षेत्रमा ६० बोरा चिनी पठाइसकेको उनले बताए ।

ती पसलहरूले चिनी प्रतिकिलो ११५ रुपैयाँमा पाइनेसम्बन्धी मूल्यसूची उपभोक्ताले देखिने गरी टाँस्नुपर्ने उनले जानकारी दिए ।

नाफा नलिई चिनी बिक्री गरिरहेको उनको भनाइ छ । “हामीले अनुगमन पनि गरिरहेका छौँ । यो चिनी दुई केजी पनि कालो जारी नहोस् भनेर हामीले अनुगमनलाई तीव्रता दिएका छौँ,” उनले भने ।