काठमाडौं । एसीसी यू–१९ प्रिमियर कपमा लगातार तेस्रो जितसहित नेपाल सेमिफाइनलमा प्रवेश गरेको छ । बिहीबार मलेसियाको वाईएसडी यूकेएम ओभलमा भएको खेलमा साउदी अरेबियाविरुद्ध ३०१ रनको फराकिलो जितसहित नेपाल अन्तिम चारमा पुगेको हो ।

नेपालले प्रस्तुत गरेको ३४८ रनको लक्ष्य पछ्याउने क्रममा साउदी अरेबिया १९.१ ओभरमा ४६ रनमै समेटियो । साउदीका निम्ति वरुण सरवणन सर्वाधिक मुदलियारले ११ रन बनाए । अरू ब्याटरले दोहोरो अंकमा रन जोड्न सकेनन् ।

साउदीविरुद्ध घातक बलिङ गरेका नेपालका दीपेश कँडेलले ६ विकेट लिए । उनले ९.१ ओभरमा १८ रन खर्चिए । आकाश चन्दले दुई र सुवास भण्डारीले एक विकेट लिए ।

त्यसअघि, टस हारेर ब्याटिङको निम्तो पाएको नेपालले निर्धारित ५० ओभरमा आठ विकेट गुमाएर ३४७ रन बनाएको थियो । नेपालका अर्जुन कुमालले १४२ रन बनाए । उनले १११ बलमा १७ चौका र दुई छक्का प्रहार गरे ।

आकाश त्रिपाठीले ९८ बलमा ६ चौका र दुई छक्कासहित ८९ रन थपे । अर्जुनले दोस्रो विकेटका लागि आकाशसँग १८९ रनको साझेदारी गरेका थिए । दीपक बोहराले २९ र विशालविक्रम केसीले अविजित २४ रन जोड्दा दीपेश कँडेल र दीपकप्रशाद डुम्रेले समान १४ रनको योगदान गरे ।

साउदी अरेबियाका लागि मोहम्मद अहमद राजा, मोहम्मद घायुर अहमद र अब्दुल्लाह शिराजले समान दुई विकेट लिए । जुहिर मोहम्मद र साहिद मुजिबउर रहमानले समान एक विकेट लिए ।

नेपालले पहिलो खेलमा इरानलाई २७४ र दोस्रो खेलमा बहराइनलाई सात विकेटले स्तब्ध बनाएको थियो ।

तीन खेलबाट ६ अंक जोडेको नेपाल समूह ‘ए’को विजेताका रूपमा सेमिफाइनलमा प्रवेश गरेको छ । हारका बाबजुद साउदी अरेबिया पनि समान खेलबाट चार अंकसहित उपविजेताका रूपमा सेमिफाइनलमा पुगेको छ ।