काठमाडौं । नेपाली कांग्रेसका महामन्त्री गगन थापाले संसदीय दलको नेतामा आफू उठ्दा सभापतिलाई भोट हालेको फोटो पठाउनेहरूले विद्रोह गर्नुपर्छ भन्न थालेको बताएका छन् । 

बिहीबार प्रेस युनियन काठमाडौंले गरेको शुभकामना आदानप्रदान कार्यक्रममा त्यस्तो सुन्दा आफू मुसुमुसु हाँसेर बसेको सुनाए । 

“भोट हाली फोटो खिचेर सभापतिजीलाई देखाउने वा देखाउन लगाउने साथीहरूले बाहिर धेरै विद्रोह गर्नुपर्छ भनेर चकचक हेर्दा मुसुमुसु हाँसेर बसेको छु,” उनले भने । 

उनले आफूले दलको नेता उठ्दा ३६ सांसद रहेको र त्यसमा थपिने विश्वास गरे पनि झन् घटेको बताए । 

“संसदीय दलको नेता लड्ने बेला मसँग ३६ सांसद छन् भन्ने थियो । बाहिर देश बदल्नुपर्छ भन्ने छ । ५–६ पटक प्रधानमन्त्री किन बनाउने ? त्यसले गर्दा साथीहरूले आँट विद्रोही चेतका साथ राख्नुहुन्छ भन्ने थियो,” उनले भने, “३६ त घट्दै घट्दैन । ३८–४० कहाँसम्म पुग्छ भन्ने लागिराथ्यो । बाहिर आउँदा २५ भनेर आयो । मान्नै पर्‍यो, त्यसका लागि काबिल भएको रहेनेछु भन्ने लाग्यो ।” 

उनले पार्टी बदल्ने बताए । ०८२ मा अधिवेशन गराएरै छाड्ने उनको भनाइ छ ।