काठमाडौं । मंगलबार त्रिभुवन अन्तर्राष्ट्रिय विमानस्थलमा हालसम्म कै सबैभन्दा धेरै उडान–अवतरण भएको छ । यो विमानस्थलको आवागमनमा नयाँ रेकर्डसमेत हो । 

उक्त दिन विमानस्थलबाट ११४ वटा उडान र अवतरण भएको हो । यो त्रिभुवन विमानस्थलबाट एक दिनमा भएको उडान–अवतरणमध्ये एतिहासकै सबैभन्दा धेरै उडान–अवतरण भएको विमानस्थलमा प्रमुख प्रताप तिवारीले बताए ।

विमानस्थलबाट दैनिक दुईतर्फी गरेर ९० देखि १०० हाराहारीमा उडान–अवतरण हुने गरेको विमानस्थल कार्यालयले जनाएको छ ।  पछिल्ला दिनमा आन्तरिक उडानतर्फ पनि चाप बढेको तिवारीले बताए । 

विमानस्थलमा भएका थुप्रै सुधार भएको विमानस्थलका प्रमुख तिवारीले बताए । तिवारीका अनुसार कोरोना महामारीपछि एयर ट्राफिक कन्ट्रोलर (एटीसी)मा पनि निरन्तर सुधार भइरहेको छ ।

“कोरोनापछि एटिसीमा धेरै सुधार भइरहेको छ । साथै, दसैँ तिहारको समय पनि भयो । विभिन्न एयरलाइन्सले फ्लाइटहरु पनि थप गरिरहेका छन् । पर्यटकीय सिजन पनि सुरु भएको कारण विमानस्थलको उडान–अवतरणमा चाप बढेको हो,” तिवारीले बाह्रखरीसँग भने । 

विदेशमा गएका नेपालीहरु दसैं तिहार मनाउ घर फर्किने भएको कारण पनि विमानस्थलमा चाप बढेको हो । अन्तराष्ट्रिय उडानका लागि विमानस्थलको ‘पिक टाइम’ भनेको राति ८ बजेदेखि ११ र बिहान पनि ८ देखि ११ हो । 

अहिले डोमेस्टिक फ्लाइटले गर्दा जुनसकै समयमा पनि उडान–अवतरण एकनासको रहेको तिवारीले बताए । “अन्तर्राष्ट्रिय उडान गर्ने विमानलाई ४ मिनेटको बीचमा उडान–अवतरण गराउन सक्ने क्षमता त्रिभुवन विमानस्थलसँग छ,” तिवारीले भने ।

विमानस्थल वायुसेवा कम्पनीलाई फ्लाइट सेडुअल दिँदा टर्मिलन, काउन्टर, पार्किङ क्षमता, ट्राफिकको डिमान्ड, एटीसीको क्षमता हेरेर दिने गरेको प्रमुख तिवारी बताउछन् । अहिले यी सबै पक्षलाई हरेर अन्तर्राष्ट्रिय उडान कम्पनीलाई प्रत्येक १०–१० मिनेटको अन्तरालमा उडान–अवतरणको अनुमति दिइँदै आएको छ ।

त्रिभुवन विमानस्थलमा तीन नेपाली कम्पनीसहित ३० वटा वायुसेवा कम्पनीले अन्तर्राष्ट्रिय उडान भर्दै आएका छन् ।  यस्तै, आन्तरिक उडानतर्फ १२ हेलिकोप्टर कम्पनीसहित २० वटा वायुसेवा कम्पनीले उडान भर्दै आएका छन् ।