site stats
बाह्रखरी :: Baahrakhari
अन्तर्वार्ता
Nabil BankNabil Bank
अखण्ड एनआरएनएका लागि मेरो उमेदवारी : आरके शर्मा
Sarbottam CementSarbottam Cement

गैरआवासीय नेपाली संघ (एनआरएनए) को निर्वाचन अन्तरगत नेतृत्वका लागि ४ जना उमेदवार मैदानमा छन् । वर्तमान कार्यकारी अध्यक्ष बद्री केसी र रविना थापाका साथै उपाध्यक्षद्वय आरके शर्मा र महेश श्रेष्ठ चुनावी दौडमा छन् । 

आकांक्षीहरुले चुनावी अभियान तीव्र बनाइरहेका बेला हामीले अध्यक्षका उमेदवार आरके शर्मासँग चुनावी वार्ता गरेका छौँ । 

एनआरएनएलाई एकताबद्ध बनाउनेसहित २४ बाचा अघि सारेर चुनावमा होमिएका शर्मा सशक्त उमेदवारका रूपमा हेरिएका छन् । मध्यपूर्वको कतारका व्यवसायी शर्मा एनआरएनएभित्र इमानदार र बेदागी व्यक्तित्वका रूपमा चिनिन्छन् । 

Prabhu Bank
Agni Group
NIC Asia

कांग्रेसदेखि कम्युनिस्ट निकट विचारधारा राख्नेहरूलाई समेटेर टिम निर्माण गर्दै चुनावी अभियानमा होमिएका शर्मा आफूले चुनाव जित्नेमा ढुक्क देखिन्छन् । प्रस्तुत छ शर्मासँग गरिएको कुराकानीको सम्पादित अंश–

–तपाईँ वर्तमान उपाध्यक्ष हुनुहुन्छ, अर्को कार्यकाल २०२३/२५ का लागि अध्यक्ष पदमा किन उम्मेदवारी दिनु भयो ?

Global Ime bank

गैरआवासीय नेपाली संघ (एनआरएनए) को १० औँ महाधिवेशनमा एउटा पक्ष संस्थाको लिगेसी धान्नुपर्छ भन्ने र अर्को राजनीतिक हस्तक्षेप गर्नुपर्छ भन्नेबीचको लडाईँका कारण संस्था नै फुटको संघारमा पुग्यो । त्यो अनुहार अहिले जताततै देख्न सकिन्छ । 

११औँ महाधिवेशनमा मेरो नेतृत्वमा दाबी किन भन्दा एउटा त म तपाईँले भनेजस्तै वर्तमान उपाध्यक्ष हुँ । त्यसकारणले पनि अब म अध्यक्षको स्वाभाविक प्रत्यासी हुँ ।  अर्को, अहिले पनि विगतको जस्तै खतरा देखिइरहेको छ । एउटा साथीहरू विल्कुलै राजनीतिको प्रयोग गरेर नेतृत्व हत्याउन खोजिरहनु भएको छ । 

एक किसिमको साथीहरूचाहिँ नीति नियमको डण्डाले ठोकेर मात्रै नेतृत्व हत्याऔँ भन्नेमा हुनुहुन्छ । 

मेरो सोचाइ के हो भने जसरी दसौँ महाधिवेशनमा एनआरएनए टुक्रियो त्यसलाई जोड्दै दुवै पक्षलाई सँगै डोहोर्याएर लैजानुपर्छ भन्ने हो । समृद्ध निर्माणको सवालमा, आर्थिक क्रान्तिका सवालमा एनआरएनएले अझै पनि धेरै गर्नु छ  । तसर्थ यो पवित्र संस्थालाई बचाउँदै भूईँमान्छेको एनआरएनए बनाउन मेरो अध्यक्ष पदमा उम्मेदवारी हो । श्रमिकको सवालका साथसाथै अखण्ड एनआरएनएका लागि पनि मेरो उम्मेदवारी हो । 

–अध्यक्षको रूपमा अघि बढ्दै गर्दा कस्तो एजेन्डा अघि सार्नुभएको छ ?
अध्यक्षका रूपमा मेरो कार्यकाल जम्मा २४ महिनाको हुन्छ । व्यवस्थितरुपले काम गर्न सकिएन भने समय त्यत्तिकै सकिन्छ भन्नेमा म सचेत छु ।  

त्यसैले, २४ महिनाका लागि २४ कार्यक्रमको खाका बनाएको छु । त्यतिमात्र होइन, प्रत्येक ३ महिनामा प्रगति विवरण तयार गर्ने लक्ष्य पनि मैले राखेको छु। मेरो पहिलो एजेन्डा भनेकै एनआरएनएहरुबीचको एकता हो । 

मेरो नेतृत्वमा अन्तर्राष्ट्रिय समन्वय परिषद् (आईसीसी) गठन हुनेवित्तिकै गैरआवासीय नेपालीहरूलाई एकताबद्ध बनाउने अभियानमा लाग्नेछु ।  तसर्थ, मेरो कार्यकालमा फुटेको होइन, जुटेको एनआरएन बन्नेछ । यो मेरो पहिलो प्रतिबद्धता हो । 

यसैगरी हाम्रो वैदेशिक रोजगारी सीपमा होइन, श्रममा आधारित छ । त्यसैले, त्रिभुवन विमानस्थलबाट नै वैदेशिक रोजगारीमा जानेलाई हेप्न थालिन्छ । 

तिनै श्रमिकले पठाएको विप्रेषणे अर्थतन्त्र धानेको छ भन्ने पनि भुलिन्छ । उनीहरूले जति श्रम बगाएका छन्, त्यसअनुसारको प्रतिफल पनि पाएका छैनन् । तसर्थ, श्रमिकको हितमा काम गरी पेसालाई सम्मानित बनाउने र तलब तथा सुविधा पनि थप बढाउने वातावरण बनाउने कार्यको पहलकदमी लिने प्रण गरेको छु ।

प्रवासी श्रमिकको आर्थिक स्थिति सुधार लाग्ने र रेमिट्यान्सको सही प्रयोगमा पहलकदमी पनि लिने मेरो बाचा छ । 

म आफैले १ हजार भन्दा बढी वैदेशिक रोजगारीमा रहेका व्यक्तिहरूलाई समेटी एक अध्ययन गर्दा रेमिटेन्स रकमको ७५ प्रतिशत भन्दा बढी रकम उपभोगमा प्रयोग गरिएको देखियो । विप्रेषणले प्रवासी कामदारको भविष्य सुरक्षित गरेको छैन । 

घरमा पठाइएको १० प्रतिशत रकम बचत गर्न लगाइ उत्पादनमूलक उद्यममा लगानी गर्ने व्यवस्था मिलाइ कामदारको भविष्य सुरक्षित गर्ने र देश विकासमा योगदान व्यवस्था मिलाउन पहल गरिनेछ । 

गैर आवासीय नेपाली कामदार भविष्य सुरक्षा प्राधिकरण गठन गर्ने, सांगठनिक पुनरसंरचन गर्ने, संस्थागत सुशासनमा शून्य सहनशीलताको नीति लागू गर्ने, खर्चिलो र भड्किलो हुने निर्वाचन प्रणालीलाई मितव्ययी बनाउने, आर्थिक कूटनीति र लगानी प्रवर्द्धनको कार्यक्रम सञ्चालन गर्ने, सम्बन्धित देशका एनसीसीले नेपालमा लगानी गर्न वातावरण सिर्जना गर्ने, विदेशमा बहुराष्ट्रिय कम्पनीको उच्च पदमा कार्यरत नेपालीहरु मर्फत नेपालमा लगानी भित्र्याउन पहल गर्ने मेरो बाचा छ । 

अधिकारसम्पन्न एनसीसी बनाउने, विदेशबाट फर्किएलाई स्वरोजगार कार्यक्रम सञ्चालन गर्नेजस्ता मेरा २४ बाचा छन् । यी बाचालाई पुरा गर्ने संकल्प मेरो छ । 

–२४ महिनामा २४ बाचा पूरा गर्ने प्रतिबद्धतका साथ चुनावी मैदानमा रहेको त भन्नुभयो, यो बाचापत्र कार्यान्वयन हुन्छ भनेर कसरी विश्वास दिलाउनुहुन्छ ?

मैले कल्पना गरेका हरेक कार्यक्रम लागू गर्नका लागि सुरु मिति र कार्यक्रम सम्पन्न हुने अन्तिम मिति सहितको समय तालिका र कार्य सम्पादन सूच  उल्लेख गरिएको योजना बनाएर बनाएर कार्यान्वयनमा लैजान्छु । 

योजना कार्यान्वयन पश्चात् भएको प्रगति विवरण त्रैमासिकरुपमा आइसीसी पदाधिकारी तथा कार्यसमितिलाई उपलब्ध गराइनेछ । त्यसका अतिरिक्त उत्कृष्ट कार्य गर्ने कर्मचारी, पदाधिकारी, समन्वय परिषद् सदस्य, एनसीसी, कार्यदल आदिलाई पुरस्कृत/वा सम्मान गर्ने व्यवस्था मिलाइनेछ । म कम बोल्ने र बोलेको काम फत्ते गर्ने स्वभावका हुँ । मैले जति एजेन्डा उठाएको छु, पुरा गरेरै छाड्छु ।

–नेपालमा पुँजी भित्र्याउने, कोष खडा गर्ने भनेर चुनावी एजेन्डा आउन थालेको धेरै भयो । तर, निर्वाचनपछि परिणाम ननिस्किने समस्या पनि छ नि ?

एनआरएनएले केही गर्दै गरेर भनिनुचाहिँ सर्वथा गलत छ । गलत यस कारण कि एनआरएनएहरुकै एक अर्ब लगानी नेपालमा भित्रिएको छ ।  परोपकारी काममा संस्थागत च्यालनबाटै एक खर्ब खर्च गरिएको छ । देश विदेशका सुखदुःखमा एनआरएनए अग्र मोर्चामा रहेको छ । यो त कुनै चुनावको बेलामा मात्रै भएको होइन नि । 

तर, यति भन्दैमा सबै ठिकठाक भन्न खोजेको होइन । संस्थामा विभिन्न समस्या हुन सक्लान् ती समस्याको सम्बोधनको एजेन्डासहित म नेतृत्वको रूपमा अगाडि आएका हुन् । सबै समस्यालाई समाधान गर्दै देशमा लगानी भित्र्याउन, आर्थिक समृद्धिमा योगदान दिन पहलकदमी हुनेछ । 

–तपाईँमाथि मध्यपूर्वको मात्रै एजेन्डा बोकेको आरोप छ नि ? के तपाईँले विश्वभरका एनआरएनए नभएर क्षेत्रीय एजेन्डा बोकेकै हो त ?

यो सवालमा मैले धेरै पटक भनिसके । मेरो २४ महिनामा गर्ने २४ कामको बाचा पत्रमा पनि स्पष्ट संसारभरका एनआरएनएको मुद्दा समेटिएको छ ।  तर, मध्यपूर्वबाट उम्मेदवार भएको भन्दै सत्यलाई लुकाएर भ्रम फैलाउने कार्य पनि भएका छन् । 

नागरिकताका लागि, सामाजिक सुरक्षा कोषका लागि, गोर्खाजका ईश्युमा को बोलेको छ ? विद्यार्थीको इश्यु कसले बोलेको छ ? म्यानमार र थाइल्याण्ड जस्ता देशमा रहेका नेपाली मूलका नेपालीहरूको इश्यु कसले बोलेको छ ? रेमिटेन्स भन्दै सधैँ धक्कु लगाउँदै गर्दा ७० प्रतिशत रेमिट्यान्सको भार कसले ओगटेको छ ? मध्यपूर्व मलेसिया, कोरिया होइन र ? 

देश निर्माणमा त्यो क्षेत्रको महत्त्वपूर्ण योगदान छ । मेरो नेतृत्व भनेको समग्र विश्वमा रहेका विज्ञान, इन्जिनियर र अमेरिका तथा युरोमा रहेका दाजुभाइ तथा दिदीबहिनी, मलेसियामा रहेका र मध्यपूर्वमा रहेका समग्र नेपालीको हो । 

–एनआरएनएमा राजनीति हाबी भयो भनिन्छ, तपाईँले यसलाई कसरी लिनुभएको छ ?
संस्थामा राजनीति हुन हुँदैन । जोकोहीको आ–आफ्नो राजनीतिक आस्था हुनसक्छ । त्यसलाई ढोकैमा छाडेर संस्थाभित्र पस्नुपर्छ भन्नेमा म स्पष्ट छु ।  तर, एनआरएनएले राजनीतिक दलहरूसँग नै सहकार्य गर्ने भएकाले दूरी कायम गर्दै सकारात्मक नतिजाका लागि पहलकदमी लिनु भने स्वाभाविक हुन्छ । 

–तपाईँलाई माओवादीको उमेदवार पनि भनिन्छ नि ? 

यो आरोप शतप्रतिशत झुट हो । एनआरएनएको पवित्र अभियानमा १७ वर्ष लाग्दै गर्दा मैले पूर्वमन्त्री कमल थापादेखि अहिलेका प्रधानमन्त्री पुष्पकमल दाहाल प्रचण्ड सँगसम्म सहकार्यको मौका पाएको छु । 

नागरिकता, सामाजिक सुरक्षा कोषलगायत सबै राजनीतिक दलसँग बराबर सहकार्य गरेको छु । म कुनै पनि राजनीतिक दलको सक्रिय कार्यकर्ता होइन । सबै राजनीतिक दलको साझा मान्छे हुँ । मलाई सबै दलको सद्भाव छ, उहाँहरूले तपाईँ अघि बढ्नुस् भने शुभेच्छा प्रकट गर्नुभएको छ । 

–एनआरएनएको चुनाव खर्चियो भएको भनिन्छ, कति खर्च गर्दै हुनुहुन्छ ?

स्वाभाविक रुपमा चुनाव खर्चिलो नै देखिन्छ । विश्वभरका एनआरएनएहरू नेपाल आउँदा सबैको खर्च हुन्छ नै । 

खर्चका साथसाथै आपसी भेटघाट र आत्मीयता पनि हुने भएकाले यो पनि सकारात्मक पाटो हो । खर्चिलो र भड्किलो हुने निर्वाचन प्रणालीलाई मितव्ययी बनाएर लैजानेबारे मैले आफ्नो बाचापत्रमै समेटेको छु । 

डेलिगेट्सको सट्टा पञ्जिकृत सदस्यले नेतृत्व चयन गर्ने, अनलाइनबाट भोट गर्ने र राष्ट्रिय र अन्तर्राष्ट्रिय समन्वय परिषदको निर्वाचन एकै दिन गर्ने र कार्यसमितिलाई समावेशी बनाउने नीति बनाउने गरी लाग्नेछु । 

मेरो हकमा भन्नुहुन्छ भने अरूले भन्दा कम खर्च गरेको छु । विश्वभरका एनआरएनएहरूले मेरो उम्मेदवारीप्रति समर्थन गर्नुभएको छ, खर्च भन्दा पनि बढी उत्साह देखिएको छ । 

–पछिल्लो समय चुनावको बेलामात्रै एनआरएनएको चहलपहल हुन्छ, एनआरएनएको आन्दोलन गन्तव्यबाट विचलित भएको हो ?

मैले अघि पनि भनेँ । एनआरएनए आन्दोलनबाटै नागरिकताको मुद्दा सम्बोधन भएको छ । विदेशबाटै मताधिकारको व्यवस्था हुँदै छ ।  वैदेशिक रोजगारीमा रहेका नेपालीका लागि आईपीओको व्यवस्थादेखि सामाजिक सुरक्षा कोषलगायत विषय एनआरएनए आन्दोलनको पनि एक हिस्सा हो । 

देशमा र देशबाहिर नेपालीलाई समस्या पर्दा एनआरएनए अग्र मोर्चामा रहेको छ । संस्था विचलित होइन चलायमान र सशक्त बन्दै गएको छ । खाली भएका केही समस्याको समाधान गर्दै संस्थालाई थप चलायमान बनाउने एजेन्डाका साथ अघि बढेको हुँ । 

–पहिलोपटक मध्यपूर्वबाट तपाईँ अध्यक्षको उम्मेदवारको रूपमा अघि बढ्दै गर्दा जित्नेमा कत्तिको विश्वस्त हुनुहुन्छ ?

चुनाव जित्नेमा म विश्वस्त छु । तर, म अझ के चाहन्छु भने सहमतिमै नेतृत्व चयन गरौँ । अझै पनि सहमति हुने विश्वास छ ।  एनआरएनएको २० वर्षको इतिहासमा ३० लाख भन्दा धेरै नेपाली रहेको मध्यपूर्वले नेतृत्व पाएको छैन । 

यो पटक मध्यपूर्वलाई नेतृत्व दिन प्रतिस्पर्धी साथीहरू तयार हुनुपर्छ । उहाँ तयार हुनुहुन्न भने लोकतान्त्रिक प्रक्रियाबाट स्वाभाविक रूपमा नेतृत्व चयन हुन्छ । 

मध्यपूर्वमात्रै होइन अमेरिका युरोप र विश्वभरका एनआरएनए अभियन्ताहरूबाट प्राप्त प्रतिक्रिया र समर्थनले उत्साहित छु । सर्वसम्मत नभएमा पनि भारी मतका साथ विजयी हुन्छु भन्नेमा ढुक्क छु । 

–अन्तिममा के भन्न चाहनु हुन्छ ?

आदरणीय गैरआवासीय नेपाली दाजुभाइ तथा दिदीबहिनीहरू । एकताबद्ध एनआरएनए र समृद्ध नेपाल निर्माणको एजेन्डासहित अध्यक्ष पदमा रहेको मेरो उम्मेदवारीलाई समर्थन गरिदिनुहुन अनुरोध गर्दछु ।  २४ महिनाको कार्यकालमा व्यवस्थितरुपले काम गरेर संस्थालाई बलियो, पारदर्शी र सशक्त बनाउन लागिपर्नेछु । यहाँहरू सबैको अमूल्य मत प्राप्त हुनेछ भन्ने विश्वास लिएको छु ।

NIBLNIBL
प्रकाशित मिति: बुधबार, कात्तिक १, २०८०  १५:२०
Sipradi LandingSipradi Landing
worldlinkworldlink
प्रतिक्रिया दिनुहोस्
Dish homeDish home
Ncell Side Bar LatestNcell Side Bar Latest
Bhatbhateni IslandBhatbhateni Island
cg detailcg detail
Kumari BankKumari Bank
Shivam Cement DetailShivam Cement Detail
Maruti cementMaruti cement
सम्पादकीय