काठमाडौं । उपप्रधान एवं रक्षामन्त्री पूर्णबहादुर खड्काले संविधानमार्फत प्राप्त उपलब्धिलाई हल्लाउने प्रयास भइरहेको बताएका छन् । मंगलबार भक्तपुरमा आयोजित एक कार्यक्रममा उनले यस्तो बताएका हुन् ।

कतिपय काम र निर्णयमा टेकेर संविधान हल्लाउने प्रयास भइरहेको उनले उल्लेख गरे । संघीय कानुन बनाउने कुरामा नेताहरू चुकेको उनको भनाइ छ ।

०७२ सालमा जारी संविधानपछिका अवधिमा सम्पूर्ण राजनीतिक दलको ध्यान संघीय ऐन बनाउनेतर्फ केन्द्रित हुनुपर्नेमा नभएको उनले बताए । उनले संघीय कानुन पहिलो प्राथमिकतामा राख्नुपर्ने भए पनि अहिलेसम्म अलमलिएको यथार्थ सुनाए ।

सबै राजनीतिक दलहरूसामु अहिले संविधान कार्यान्वयनको चुनौती रहेको उनले बताए ।

“...अहिलेको संघीय लोकतान्त्रिक गणतन्त्रको संविधानलाई विभिन्न बहानामा, विभिन्न कारणले हामीले गरेका कतिपय कामबाट, कतिपय निर्णयबाट तिनै कुरालाई बोकेर, मुद्दा बनाएर संविधानलाई हल्लाउने कोसिस भइरहेको छ । संविधानलाई चलाउने कोसिस भइरहेको छ,” उनले भने, “संघीय लोकतान्त्रिक गणतन्त्रको संविधानमार्फत प्राप्त उपलब्धिहरूलाई हल्लाउने प्रयास भइरहेको छ । त्यसलाई जोगाउनु छ, कार्यान्वयन गर्नु छ । तर, संघीय कानुन बनाउने कुरामा हामी चुकेका छौँ । २०७२ सालमा जारी गरेको संविधानपछिका आठ वर्षको अवधिमा सम्पूर्ण राजनीतिक दलको ध्यानकेन्द्रित हुनुपर्दथ्यो । संघीय ऐन निर्माणमा ध्यानकेन्द्रित हुनुपर्दथ्यो । संघीय कानुन पहिलो प्राथमिकतामा राख्नुपर्छ भनेर हामीले ध्यान दिनुपर्नेमा अन्य कुरामा अलमलिएका छौँ । त्यो कमजोरीलाई स्वीकार्नुपर्छ ।”

उपप्रधानमन्त्री खड्काले जनतामा छाएको निराशालाई आशा र विश्वासमा परिणत गर्नुपर्ने र पार्टीपंक्तिको आशंकालाई चिर्न सक्नुपर्नेमा जोड दिए ।