काठमाडौं । नेकपा (एमाले)का पोलिटब्युरो सदस्य महेश बस्नेतले अराजकका कारण मुलुकमा लोकतान्त्रिक हकअधिकार कार्यान्वयन गर्ने विषय चुनौतीपूर्ण बनेको बताएका छन् । शनिबार काठमाडौंमा आयोजित साक्षात्कार कार्यक्रममा उनले अराजकवादीले मुलुकको परिवर्तनमाथि नै हमला गर्ने गरेको टिप्पणी गरे ।

उनले गृहमन्त्री नारायणकाजी श्रेष्ठको कार्यशैलीको पनि आलोचना गरे । बस्नेतले देशमा शान्ति, सुरक्षा निकै कमजोर बनेको जिकिर गरे ।

उनले मेडिकल व्यवसायी दुर्गा प्रसाईंको गतिविधिको कडा विरोध गरे । आफूहरूले शान्तिपूर्ण ढंगले कार्यक्रम गर्दा कसैले ‘थ्रेट’ दिए चुप लागेर नबस्ने उनको चेतावनी थियो ।

झापामा आफूहरूको कार्यक्रम बिथोल्नका निम्ति पहिचानवादी र दुर्गा प्रसाईंका समर्थक मिलेर आएको उनको भनाइ छ । सरकारले अराजकलाई कानुनी दायरामा नल्याए प्रतिकारमा उत्रन बाध्य हुने चेतावनी समेत उनले दिए ।