काठमाडौं । प्यालेस्टाइनी राष्ट्रपति महमूद अब्बासले गत जुनमा बेइजिङको भ्रमण गर्दा इजरायलसँग जारी द्वन्द्व समाधानका लागि चीनले महत्वपूर्ण योगदान गर्ने प्रतिवद्धता व्यक्त गरेको थियो ।

एकअर्काका कट्टर प्रतिद्वन्द्वी इरान र साउदी अरेबियाबीच केही महिनाअघि बेइजिङको मध्यस्थकर्तामा भएको मेलमिलाप सम्झौतालाई चीनले मध्यपूर्वमा आफ्नो उपस्थिति विस्तार गर्ने संकेतका रूपमा हेरिएको थियो ।

तर, प्यालेस्टाइनी लडाकु समूहले इजरायलमा आक्रमण गरेपछि चर्किएको द्वन्द्वका बेला मध्यपूर्वमा चीनको परीक्षणसमेत भइरहेको छ ।

१२०० इजरायली र ९५० भन्दा बढी प्यालेस्टाइनीको मृत्यु भइसकेको संकटमा चीनले दुवैपक्षलाई संयमताको लागि नम्र आह्वान गरेको छ ।

चिनियाँ राष्ट्रपति सी चिनफिङ गत डिसेम्बरमा मध्यपूर्वको भ्रमण गर्दा उनले यस क्षेत्रका लागि बेइजिङ नेतृत्वको सुरक्षा पहल अमेरिकी नेतृत्वमा रहेको प्रणालीको विकल्प भएको दाबी गरेका थिए ।

इजरायल र प्यालेस्टाइनी लडाकु समूह हमासबीचको द्वन्द्वमा चीनको प्रारम्भिक प्रतिक्रियाले भने विश्वको नयाँ शान्ति निर्माताका रूपमा यसको प्रचारलाई अस्वीकृत गर्ने विज्ञहरूको भनाइ छ ।

अमेरिका, युरोप र एसिया, अफ्रिका र ल्याटिन अमेरिकाका धेरै देशहरूले हमासको आक्रमणको निन्दा गर्दै इजरायलको पक्षमा समर्थन व्यक्त गरेका छन् । बेइजिङले भने आफूलाई तटस्थ देखाएको छ ।

आइतबार एक वक्तव्य जारी गर्दै चिनियाँ विदेश मन्त्रालयले दुवै पक्षलाई शान्त रहन, संयम अपनाउन र तुरुन्तै शत्रुता अन्त्य गर्न आह्वान गरेको छ।

चीनले द्वन्द्वको समाधानका रूपमा स्वतन्त्र राज्य प्यालेस्टाइनको स्थापना गर्नुपर्ने कुरा राखेको छ ।

बेइजिङस्थित इजरायली दूतावासका एक वरिष्ठ अधिकारी युवल वाक्सले आफ्नो देशले चीनबाट हमासको कडा निन्दाको अपेक्षा गरेको बताएका छन् ।

भ्रमणका क्रममा बेइजिङमा रहेका अमेरिकी सिनेटका नेता चक शूमरले सोमबार सीसँगको भेटमा चीनको प्रतिक्रियाप्रति निराशा व्यक्त गरेको बताइएको छ ।

चिनियाँ सञ्चारमाध्यममा द्वन्द्वको कभरेज तटस्थताको संकेत गर्ने किसिमको नभएको बताइएको छ । यसरी चीनले इजरायल र गाजामा चर्किएको द्वन्द्वका बेला बलियो स्थिति समात्न नसकेकोले मध्यपूर्वमा यसको भूमिकाको कमजोर आँकलन हुन थालेको छ ।